Shillong, Jymmang, 11: U Myntri Rangbah ka jylla u Conrad K Sangma u la kyrpad ïa u Myntri ka tnat pule puthi jong ka sorkar pdeng u Dharmendra Pradhan ban bthah ïa ka National Testing Agency (NTA) ba kan bishar bniah bad pynbeit biang ïa ki Centre ban pynlong ïa ka Common University Entrance Test (CUET) (UG) 2025 na ka bynta ki samla pule jong ka Meghaaya hapoh ka jylla.
Ha ka shithi sha u Pradhan, u Sangma u la ong, “…nga kyrpad jur ïa ka jingïarap jong phi ban: bthah ïa ka NTA ban bishar bniah bad ai bhah ïa ki jaka pule jong ki samla pule Meghalaya hapoh ka jylla da kaba pynkynriah ne buh da kawei pat ka sngi ban pynlong ïa ka eksamin na ka bynta ki samla pule ka Jylla Meghalaya mynta u snem tad haduh ban da ïoh ïa ki jaka thoh eksamin kiba biang. Ka jingkyrpad ïa phi ka long namar ka jingkyrkieh jong ka kam hadien ka jingpynsngew na ki samla bad nga shaniah ba ka ophis jong phi kan shimkhia ïa kane ka kam.
U la ong ba ka mat kaba ïadei bad ka jingpynlong ïa ka eksamin CUET (UG) 2025 bad ka jingbym biang ki jaka thoh eksamin hapoh ka jylla ka la wanrah ïa ka jingsyier kaba khraw ïa ki khynnah skul bad ki kmie ki kpa ha kylleng ka jylla Meghalaya.
Katkum ka jingong jong u, bun bha ki samla pule kiba la jied ïa ki centre hapoh ka Jylla Meghalaya khamtam eh ha nongbah Shillong kiba la ïoh ïa ki jaka thoh eksamin sha ki jaka kiba jngai kum ha Jorhat, Dibrugarh, Mizoram, Nagaland bad wat sha Kolkata.
“Kane ka la buh ïa ka jingeh kaba khraw ïa ki samla pule, khamtam kito kiba wan na ki longïing kiba duna ka ïoh ka kot, kiba mynta ki hap ban bei ïa ka jinglut kaba heh ha ka leit ka wan bad ïa ka jaka sah. Ha kiba bun ki khep, kine ki jinglut jingsep ki long palat ïa ka bor jong ki,” ong u Sangma da kaba bynrap ba ka jingeh kaba mih na kane kam shym la pynthut tang ïa ka jingpynkhreh jong kine ki samla pule hynrei ka long kumba pynbor ba kin iehnoh shisyndon ïa ka eksamin.
Kane ka jinglong jingman ka la mih wat hapdeng ka jingkyrpad bad ka jingpynthikna ba ladep ha kaba ïadei bad ka jingdon jong ki Centre kiba biang hapoh ka jylla.
“Ka long kaba kongsan ban tip ba ka sorkar Meghalaya ka la ai jingkyrshan pura ïa ka NTA da kaba ithuh ïa ki jaka ba lah ban pynlong ïa ki jaka thoh eksamin bad tyrwa ïa baroh ki jingïatreilang bad ki bor pynïaid. Ngi la thaw ruh ïa ka State Lebvel Committee ryngkat bad ka District Level Committee ban pynsuk ïa ka jingïaid beit ïaid ryntih jong ki eksamin ba la pynlong da ka NTA hapoh ka jylla.”
Wat hapdeng kine ki jingpyrshang, ka jinglong jingman kaba mynta ka dang long ka daw kaba wanrah ïa ki jingeh,” u la ong.
