Shillong, Risaw, 31: Ar phew ar ngut ki briew, kynthup ïa ki khynnah rit, la ïoh ban pyllait im da ki Pulit na ka kti jong ki paidbhur kiba don kumba 20 ngut kiba la thombor ïa ka longiing jong u Bah Ham Shangpliang ha ka shnong Khlieh Shnong, Sohra ha ka miet sngi Palei, kiba la byrngem ruh ban pynjulor bad ban wiang ding ïa ka iing.
Kane ka la jia tang na ka daw ba la mih ka jingkynnoh suba menaiksuid da uwei u khynnah rit uba la kam ba u shah leh sniew ha u Bah Shangpliang.
Halor kane ka jingjia, haduh mynta ki Pulit ki la kem khyndai ngut ki briew ba la ithuh kum ki nongkynshoit ïa ki paidbhur.
Ki Pulit la register hapoh ka Case No. 109 (1)/118 (1)/125 (b)/127 (2)/131/132/324 (6)331 (5)/3(5) BNS ha Sohra Police Station.
Katkum ka jingïathuh jong ki Pulit, la khmihlynti ba kin sa nang kem shuh shuh halor kane ka jingjia.
Ka jingtohkit ki Pulit ka lap ba kane ka jingjia ka la mih na ka jingkam jong uwei u khynnah rit uba la kynnoh ba u la ‘ïohi paw’ ïa u Bah Ham Shangpliang bad ngeit ruh ba u la shah ai ksuid ha u Bah Shangpliang, la ong ki Pulit.
Kine ki jingkynnoh ba khlem lah ban pynshisha ki paw ba ki wanrah ïa ka jingsheptieng, ka jingkulmar jingmut bad ka jingmih paidbah hapdeng ki nongshong shong, kaba lam ruh sha ka jingïalum briew khlem ïohbor bad kaba pynmih ïa ka jingbyrngem byrsit, la ong ki Pulit.
Tang shu ïoh jingtip halor kane ka jingjia, ka kynhun ki Pulit bad ki Majistor na Sohra mar mar ki la leit sha Khliehshnong Sohra, ha kaba la pyndonkam ban siat ïa ki bom pynsat khmat bad ki Stunt Grenades ban pynpra ïa ki paidbhur tad haduh ban da ïohlad ban ai jingïarap ïa ki lanot kiba sahkut hapoh ka iing.
Shuh shuh ki Pulit SOT na Shillong ki la leit ban ai jingïarap khnang ban tem ïa ki paidbhur.
Da ka jingtrei shitom jong ki bor Pulit bad ki Magistrate la lah ban pyllait im ïa ki 22 ngut ki briew, kynthup ki khynnah rit, ha kaba la pynkit noh ïa ki sha Shillong Civil Hospital ban leh ïa ka medical examination.
Ha kane ka jingjia, phra ngut ki Pulit ki la mynsaw.
