Shillong, Lber, 12: Saw ngut ki briew ki la shah kem ha ki Pulit halor ka jingkynnoh donkti ban thombor ïa ka ïingsah jong ka kong Theresa Dkhar kaba dei ruh ka para trai jong u MLA ka Mawshynrut Constituency u Bah Methodius Dkhar kaba don ha ka shnong Seinduli-1, West Khasi Hills District.
Katkum ka tyllong khubor ba la ïoh lum la ïathuh ba kane ka la jia ha ka miet sngi Baar ha ka por kumba 11:30 baje mynmiet.
La ong ba ki runar ki la kawang da ki maw ryngkat ki bilor ia kaba la suba ba ki la thmu ban pynbthei ïa ka ïingsah jong ka Kong Theresa hynrei donbok ba ha kane ka jingjia kam shym don kano kano ka jingmynsaw jong ki briew kiba don hapoh ïing kynthup ïa ki khyllung.
Tang shu ïohsngew ïa ka jingshah kawang maw ka ïing, ki trai ïing ki la mih ban khongoid shabar hynrei ki runar ki la phet krad noh bad la shu lap ïohi pat ïa kawei ka kali kaba ki pyndonkam kaba dei ka Grand Vitara kaba don ïa u number ML10 D 0254 bad kham hadien la ioh jingtip ba ka kali ka dei jong uwei u briew ba la tip kyrteng kum u Skhemborlin Hoojon.
Ha kaba ïadei bad kane ka jingjia, ka kong Theresa Dkhar bad u Bah Alberal Thongni ki la mudui da ka ejahar ha Riangdo Police Station bad katkum ki tyllong khubor ba la iohlum la ong ruh ba ki Pulit ki la ioh kem noh ia uwei uba suba donkti ia uba la tip kyrteng kum u Firstbonshine Palair na ka shnong Seinduli-1.
Ha ka ka jingtohkit kaba bniah, ki Pulit ki la ïohkem noh sa lai ngut kiwei pat kiba kiba suba donkti.
U Superintendent of Police jong ka West Khasi Hills u Bikram D. Marak u la ïathuh ba ki 3 ngut kiba la shah kem ki dei kiba la tip kyrteng kum u Shanbor Shangoi Syiem 38 snem na Seiñduli-1, u Skhemborlin Hoojon 40 snem na Nongryngkew A bad u Silicus Swangre 35 snem na Tynhiang.
Ki Pulit ki la register case hapoh Mawshynrut Police Station hapoh ka Section 125/324 (4) BNS bad ka jingtohkit ka dang ïaid shakhmat.
