Shillong, ïaïong, 19: Ka dang shen ka la shah thung kum ka dkhot jong ka Kashari ka skulbah North-Eastern Hill University (NEHU).
Kan long ka jingsngewsarong kaba khraw bad ka jingsngewburom ba ka MP jong ka Rajya Sabha na ka jylla Nagaland ka S. Phangnon Konyak ka la shah thung kum ka dkhot ha ka Kashari jong ka skulbah North-Eastern Hill University (NEHU) da u Vice President ka ri India uba long ruh u Chairman jong ka Rajya Sabha, naduh ka 15 tarik, Ïaiong, 2025 katkum ka jingbthah ba la pynmih da ka Rajya Sabha Secretariat, la pyntip u kyrwoh ba la phah sha ki lad pathai khubor.
Ïa ka skulbah NEHU ba la pynkha ha ka 19 tarik, Naitung, 1973 lyngba ka aiñ jong ka Parliament, ka la long kawei na ki shlem pule kaba pawnam ha ka thaiñ Shatei Lammihngi jong ka ri India. U pud treikam jong ka skulbah NEHU u ïar shaduh ka jylla Meghalaya bad Nagaland, ryngkat bad ki Union Territory ba mynshwa jong ka Arunachal Pradesh bad Mizoram.
Ha ki katto katne snem, ka skulbah NEHU ka la lah ban pynkylla ha kaba saiñdur ïa ki riewstad bad ki nongsynshar ha kane ka thaiñ. Ka skulbah ka la pynmih ïa ki pateng jong ki riewstad, ki nongsynshar, ki nongïalam paidbah bad ki nongsaiñ kiba la noh synñiang shikatdeh ei sha u sup u thiar jong ka roi ka par jong ka ri.
Ka jingthung dkhot ïa ka Konyak ka long namar ka jingaiti lut ha ka jingshakri paidbah bad ka jingangnud ban kyntiew ïa ka pule ka puthi bad ka jingangnud ban kyntiew ïa ka roi ka par jong ka thaiñ Shatei Lammihngi.
Ka jingïadei jong ka bad ka skulbah NEHU ka pynsawa ïa ka tien phira jong ka skulbah kaba ong, “To khie bad tei.”
Da kane ka jingshah thung kum ka dkhot la khmihlynti ba kan nang pynïar shuh shuh ïa ka jingïadei hapdeng ka skulbah bad ki paidbah nongshong shnong ka thaiñ bad ban ai jingkyrshan ha kaba pyntyllun shakhmat ïa ka jingkiew irat ka pule ka puthi bad ka jingnang jingstad.
