Shillong, Naitung, 13: Da ka jingkmen kaba khraw ka Shillong Lajong Football Club ka la pynbna paidbah ba ka la thung ïa u Jose Carlos Rodriguez Hevia na ka ri Spain kum u Head Coach ba thymmai jong ka Club na ka bynta ka samoi jong u snem 2024/25.
Ka Shillong Lajong ka la khmihlynti ruh ba ka jingthung ïa u Jose kum u Head Coach uba la tbit bha ha ka jingai jinghikai ha ki jingïalehkai phutbol un sa lah ban kyntiew ïa ka jingïalehkai phutbol ha kane ka jylla Meghalaya.
U Jose u dei uba ïoh ruh ïa ka pro licensed coach na ka UEFA bad uba la don ïa ka jingtbit kaba palat 25 snem ban ai jinghikai ha kiba bun ki liang ha ka jingïalehkai phutbol hadien ba u la sdang ïa ka jingai jinghikai kum u Coach ha kylleng jong ka ri Spain.
Nalorkata, u Jose u la shah thung ruh kum u Technical Advisor jong ka Arsenal Soccer Schools ha ri India naduh u Naiwieng, 2014 haduh u Naitung, 2016 kaba don ïa ka jaka treikam ha Pune. Hapdeng kine ki samoi, u la long ruh u dkhot jong ka FC Pune City naduh u Rymphang, 2015 haduh u Naitung, 2016.
Hadien kane u la leit noh sha Minerva Punjab na ka bynta ka samoi jong u snem 2017 bad nalor kata u dei ruh uba la don bynta ban ai jinghikai ïa ki kynhun ïalehkai phutbol Junior bad Senior. Shuh shuh u Jose dei ruh uba la don bynta ban jied ïa ki rangïalehkai ba kynsai jong ka ri India kaba la mihkhmat ha ka FIFA Under-17 World Cup kaba la long ha ri India ha u snem 2017.
Ha u snem 2019/2020 u Jose u la shakri ïa ka Shillong Lajong kum u Technical Director, kum u Coach bad kum u Youth Development ha kaba u la lah ban pynjop ïa ka Club ha ka lympung ïalehkai jong ka Shillong Premier League bad ha ka Meghalaya State League ha u snem 2019. Hadien kane, u la leit pat ban shimti sa ïa ka Mohammedan SC na ka bynta ka samoi jong u snem 2020/21 kum u Head Coach.
Da ka jingshimti jong u Jose kum u Head Coach ba thymmai jong ka Shillong Lajong Football Club, u Coach ba mynta u Bah Bobby L. Nongbet un sa shimti noh kum u khlieh jong ka Youth Development jong ka Club.
