Shillong, Jymmang, 31: Tang hadien lai snem ba ka ri India ka la ïoh ïa ka jinglaitluid na ka jingsynshar ki Phareng, ki nongshong shnong jong ka shnong Pyndengumiong Mairang ha u snem 1950 ki la seng ïa kawei ka skul ïa kaba la tip kyrteng mynta kum ka Pyndengumiong Government Lower Primary School.
Kane ka skul kaba la rim tam ha ka shnong Pyndengumiong mynta ka la kynjoh sha u mawmer ba 75 snem ha ka jingïaid lynti jong ka ban tbeh ïa ka sharak jong ka jingnang jingstad sha ka shnong ka thaw. Hadien ba ka sorkar ka la pynmih ïa ka hukum ba baroh ki Lower Primary School kin pynlong skul noh mynsngi, kane ka skul ka la shim ïa ka sienjam ban pynkylla noh ïa ka rukom hikai na ka ktien khasi sha ka ktien English bad ha une u snem 2025 ki khynnah kiba pule ha kane ka skul ki don 144 ngut.
Hapoh ka jingïalam u bah Bornard Syiemiong kum u Chairman jong ka School Managing Committee bad u Bah Glovis Basaïawmoit kum u Secretary bad u Head Teacher, kane ka skul ha ka 30 tarik, Jymmang 2025 ka la plie ïa ka jingrakhe ïa ka Platinum Jubilee ha kaba u MLA ka Mairang Constituency u Bah Metbah Lyngdoh uba dei ruh u Chairman jong ka Meghalaya State Planning Board ka Sorkar jylla u la plie pyrda ïa ka jingrakhe Jubilee ha ka jingïadonlang jong u MDC ka Mairang Nongkhlaw Constituency u Bah Equator Nongrang, u SDSEO jong ka Mairang u Bah J. Thyrniang nalor kiwei kiwei kiba la shah khot sngewbha.
Shuh shuh la ïathuh ba kum shi bynta ban ai ïa ka jinghikai kaba paka sha ki khynnah pule naduh ka Class-Nursery haduh Class-5, ka School Managing Committee nalor ki san ngut ki nonghikai kiba la don lypa ka la thung biang sa iwei i nonghikai bad ka la pynlut na ka pisa jong ka Shnong ban siew ïa ka tulop, hynrei ki nonghikai jong kane ka skul kim pat hun tang katta haba ki ïohi ïa ka jingdonkam ban pynjanai shuh shuh ïa ka rukom ai jinghikai bad kumta ki la thung biang sa i wei i nonghikai da kaba synniang na ka tulop kaba ki ïoh bad ban siew ïa ka tulop jong ita i nonghikai ba ki la thung hi.
