Shillong, Nailar 05: U state president jong ka seng BJP u Rikman G Momin u la pynïar ïa ka kynhun treikam jong ka party da kaba thung ïa ki 52 ngut ki State Executive Member, ryngkat bad ki 12 ngut ki Special Invitee bad 4 ngut ki Permanent Invitee.
Kine ki 4 ngut ki Permanent Invitee ki kynthup ïa ki MLA u Bah AL Hek (Pynthorumkhrah) bad u Bah Sanbor Shullai (South Shillong) – bad 2 ngut ki State President barim u Bah Shibun Lyngdoh bad Bah Ernest Mawrie.
Kiwei pat ki Special Invitee ki kynthup ïa u MLA barim u Winnerson Sangma, bad 4 ngut ki State President barim ba kynthup ïa u Bah Khlursing Lyngdoh, bah HS Syiemlieh, u Dr W. Kharshiing bad Moina Sing Phyllut, u Bah Wilfred Khyllep Ophiar IAS ba la shongthait, u LM Sangma Ophisar MCS ba la shongthait, ka Dr Fenela Nonglait, ka Dr Rita Tariang, Bah Wandonbok Jyrwa, Bah Banteilang Sing Rumnong bad u Dr Praksing Nongrum.
Kane ka jingpynïar ïa ka seng ka la long ha ka jingïalang ha shwa ban khot ïa ka State Executive Meeting, ka ban long ha Shillong ha une u bnai, ong u kyrwoh khubor na ka BJP.
