Shillong, Rymphang, 14: Ki nongïalam jong ka Khasi Students’ Union (KSU lyngba ka Employment Monitoring Cell bad ka Education Cell ha ka sngi Thohdieng pan jingpynshai na u Vice Chancellor jong ka National Law University (NLU), Meghalaya ha kaa la kynnoh ba ka don ka jingthepkam sopsop da u Vice chancellor ïa ka post Deputy Registrar bad kumjuh ruh ka jingthepkam sopsop ha kiwei pat ki post ha kane ka skulbah pule aiñ.
Haba kren sha ki lad pathai khubor u Chairman jong ka Employment Cell ka KSU u samla Reuben Najiar u la kam ba u Vice Chancellor u la thungkam ïa u Dy.Registar khlem kano kano ka lynti kaba bniah.
“Hadien ba la pynbna ïa ka Advertisement la jied ïa ki san ngut kiba lah ban leit sha ka Personal Interview bad ïa ka result kaba khlem pynbna paidbah la shu thung ïa u Gurpreet Sing kum u Dy. Registrar,” la ong u samla Najiar.
U la ïathuh ruh ba ka jingïakren bad u Vice Chancellor kam shym la seisoh satia namarba um kwah ban ai jingpynshai ïano ïano ruh da kaba ong ba ka don ka Governing Council kaba kynthup ïa ki heh sorkar, ki IAS Officer kiba dei dkhot bad lyngba ka jingdon jong ki, ka jingthung kam hapoh ka University la pyntip beit sha ki.
“Hato tang ka jingdon jong ka Governing Council ka la biang seh ban thungkam ïano ïano. Shatei kata ka jingthungkam kaba khuid kaba ngi dawa na ka por sha ka por,” la buh jingkylli une u nongïalam ka seng bad kam shuh shuh, “ngi lap ruh ba ki don ki khun, ki para jong ki ophisar IAS kiba ïohkam hapoh ka NLU khlem da pynmih ïa ka Advertisement. Kine ki dei kiba ktah mationg ïa ka jylla baroh kawei. Ki bun ki samla kiba la tbit ban ïoh ïa ki kam hynrei kim don lynti. Kine ki dei ki daw ba u Vice Chancellor u leh donbor ba ki don kiba kyrshan ïa u ban thungkam katba mon.”
U la ong ruh ba la shu thung ïa ki Contractual khlem kano kano ka jingthungkam kaba biang.
“Shwa ba ngin wan shane ngi la pan da ka RTI hynrei u Vice Chancellor u la maham ïa u Public Information Officer (PIO) ban ym jubab ïa ka RTI bad u la pynslem ruh ban ai ïa ka jubab RTI haduh 94 sngi. “Dei tad ynda ngi la apil ngi la ïoh ïa ka jubab hadien 94 sngi. Hynrei ka jubab kam long kaba shai,” la ïathuh u samla Najiar.
“Ngin ym ailad satia namarba ki Professor kiba wan nabar ki leh mon bad kim bud ïa ki kyndon jong ka aiñ,” la kynthoh u samla Najiar.
U la kynnoh ruh ba kane ka skulbah kam shym la pynpaw paidbah satia wat ïa ka Act bad ka Statutes hapoh ka website namarba ka sheptieng ïoh shah wohnia.
Shuh shuh u la kynnoh ruh ba ïa ki Permanent Post u Vice Chancellor u la pynkylla Contractual Post. “Ka daw hi kaba ngi sngewthuh lada u hap ban bud ïa ka Reservation Policy ki Khasi jong ngi kin ïohkam beit, hynrei da kaba pynkylla Contractual u lah ban thung ïa ki paralok nabar jylla ban wan hikai hangne,” la kynnoh shuh shuh u samla Najiar.
Katkum ka dorkhas jong ka KSU, ka pynpaw ba ki post ba la lait ki long ka kam Deputy Registrar, ka post Associate Professor bad Assistant Professor, Professor of Practice, Research Fellow, Post – Doctoral Fellow, bad kiwei kiwei.
“Ka jingjyrsieh hapoh ka NLU ka long haduh katta katta bad ngin sa sei madan hi ïa kiei kiei baroh,” la kynthoh u samla Najiar bad ong ruh shen ka seng kan sa leit ïakynduh ïa ka Myntri ka Sorkar Jylla kaba peit ïa ka tnat Law ka Dr. Ampareen Lyngdoh ban pan jingpynshai halor kane.
Ka seng ka la dawa ruh ban pyndam mardor ïa ka jingthungkam ïa u Gurpreet Sing bad ban pynbna paidbah ïa ka result katkum ka State Reservation Policy kynthup ruh ïa kiwei kiwei ki post ba la pynbna paidbah.
