Shillong, Lber, 20: Ki nongïalam jong ka Hynñiewtrep National Youth Front (HNYF) Southern Border Area ha ka sngi Palei ki la sei madan ïa ka jubab RTI ba la ïoh pdiang na ka ophis jong u Sub-Divisional School Education Officer, Shillong ban pynpaw pyrthei halor ka jingthung ïa u nonghikai Hindi ha Dangar Dombah Border Area Upper Primary School khlem da don ki dulir bad ki kot ki sla kiba biang bad ïa ka jingsiew bainong ïa u nongshet-ja sngi Midday Meal naduh u snem 2018 haduh u snem 2025.
Ha ka jingïakren bad ki lad pathai khubor ha Shillong Press Club, u President ka seng Bah Kyllang Thongni u la ong hadien ba ka seng kaba la ïoh pdiang ïa ka jubab RTI ka la pynlong ïa ka jingtohkit ban lap ïa ka jingshisha hynrei kaba pynlyngngoh ka long ba ka jingthung ïa u Rajiv Kr. Shukla kum u nonghikai ha ka sobjek Hindi ka long khlem ki kot ki sla kiba biang bad kam ruh ba wat ka ophis u SDSEO kam shym la lah satia ban ai ïa ka Bio-data jong une u nonghikai ha ka jubab RTI ba ka seng ka la pan.
Nalor kata, u Bah Thongni u la kam ruh ha ka jingleit tohkit hapoh skul ki nonghikai ki la ïathuh ba kim shym la ïoh satia ïa u khaw Midday Meal uba la mang naduh u snem 2018 haduh une u snem 2025 watla ha ka jubab RTI la pynpaw ba ka jingsiew bainong ïa u nongshet Midday Meal ka long T. 10,6346. 92 lak na ka bynta u snem 2018-2019,2019-2020, 2020-2021, 2021-2022, 2022-2023, 2023-2024 haduh u snem 2024-2025.
Une u nongïalam u la ong ba ka seng ka phah ïa kane ka khubor sha ki bor ba dei peit jong ka tnat Pule Puthi ba kum ki nongïalam kin ym shong thait wat haduh ban leit tied ïa ka jingkhang jong ka Iingkashari.
