Shillong, Nailar, 13: Ki shipai Border Security Force (BSF) ka Meghalaya Frontier, da ka jingïatreilang bad ki Pulit ka jylla Meghalaya bad palat 200 ngut ki paidbah nongshong shnong ki la pynlong ka jingthwet kaba jur ha ki bynta jong ka khlaw Majersora–Hathinala hadien ba la pynthikna ba ka don ka jingrung tuh jong ki runar Bangladeshi ha ka thaiñ Bagli jong ka South West Khasi Hills district.
Ha u kyrwoh, ka tnat shipai BSF ka la pyntip ba ha ka 8 tarik, Nailar, 2025, ka kynhun Gang kaba don kumba 8–9 ngut kiba la kieng atiar bha ki la rung beaiñ shapoh u pud u sam jong ka ri India, da kaba leit pyntriem ha ka shnong Rongdangai bad dung pynmynsaw ruh ïa u Balsrang A. Marak, 21 snem ka rta, ki la pynjulor ruh ïa ki jingdon jingem bad ki la pyrshang ruh ban rahbor ïa u.
Naduh ka 9 tarik haduh ka 11 tarik, Nailar, 2025, ki shipai BSF bad ki Pulit kiba la pynlong ka jingkhynra lang ki la ïohkem ïa ki saw ngut ki suba runar Bangladeshi bad na ka met jong ki la ïoh kurup ïa ka Identity Card Pulit, ki Wireless Sets, ka khanshi khap waïar, ki pisa India bad Bangladesh, ki tiar pynbthei bad u hetkheri.
Haduh mynta, haduh hynriew ngut ki runar Bangladeshi ki la shah kem. Uwei na ki, ba la ithuh kyrteng kum u Akram na Sherpur, Bangladesh, uba la shah kem ha ki paidbah u la khlandoh katba dang pynkit sha Khonjoy PHC.
Ki san ngut kiba la shah kem ki dei kiba la tip kyrteng kum u Mefus Rehman, 35 snem, u Meruphur Rahman 32 snem, u Saem Hussain, 30 snem, u Jangir Alom 25 snem bad u Mubarak Hussain Maina, 27 snem.
Ha ka 12 tarik, Nailar 2025, ka kynhun ki shipai BSF ba la ïarap lang da ka kynhun K9, ki Pulit ka Meghalaya na Gumaghat PS bad Ranikor, bad ki dkhot ka Village Defence Party ki la khang kdong lut ha baroh ki jaka rung bad ki jaka mih ha kaba ki la ïoh kurup uwei u bom shna hi bym pat bthei.
Ka jingthwet ka dang ïai bteng haduh mynta ban ïohkem ïa ki runar kiba dang lait phet.
U Inspector General ka tnat shipai BSF Meghalaya Frontier u OP Upadhyay, da lade hi u la khmih bniah ïa ka jingkhynra bad u la ïaroh ruh ïa ka jingtrei shitom jong ki shipai, ki Pulit bad ki paidbah.
U la ïaiban ba ka thong ba hakhmat eh jong ka tnat shipai BSF ka long ban ïada ïa ki khappud ka ri India na kino kino ki jingrung beaiñ ki mynder ri.
