Shillong, Risaw, 25: Ki Pulit ka East Khasi Hills ha ka step sngi Saitjaiñ ki la kem ïa uwei u briew uba la tip kyrteng kum u Tamdorlang Risaw, 42 snem ka rta, uba sah ha ka shnong Nongrah Block-II, Shillong halor ka jingkynnoh ba u dei uba ju mlien ban leh kynshlei ïa ki kynthei la bun bun sien ha ka thain Laitumkhrah, Shillong.
U Superintendent of Police ka East Khasi Bah Vivek Syiem ha u kyrwoh ba la phah sha ki lad pathai khubor ha ka sngi Saitjaiñ ula pyntip ba ïa u Tamdorlang Risaw la ïohkem na ka shnong Tawang, Mawsynram, da u Officer-in-Charge ka Mawsynram Police Station bad ka kynhun jong u.
Ïa ka kali Bolero ba la pyndonkam ha ka jingleh kam pohjait la kurup noh da ki Pulit.
U SP u la pyntip ba ïa u nongshah kynnoh yn sa tian bishar ha Kashari.
Ha u kyrwoh, u SP u la ïathuh ba ka jingkem ïa u Tamdorlang ka long hadien ba ki Pulit ka Laitukhrah Police Station ha ka 15 tarik, Risaw, 2025, ki la ïoh pdiang ar tylli ki ejahar ba la ujor la kajong na ki ar ngut ki nongujor kiba la pyntip ba ki la ngat la bun bunsien ka jingshah leh kynshleiñ khlemakor ha jaka paidbah da uwei u nongñiah ka kali Bolero baiong kaba don ïa u registration number ML05P 7884.
Ki jingjia, ki la jia ha ki bynta bapher bapher ha ka thaiñ Laitumkhrah, kiba ïadei bad ujuh hi u briew bad kajuh ka kali.
Ki jingjia ba dang shen katkum ka ejahar ba la ujor ka long ha u bnai Jymmang, 2025, ha kaba la pyntip ba la ïohi ïa kali Bolero rong iong kaba ieng hajan Don Bosco Square, Shillong. La kynnoh ba u nongñiah u la leh ïa ki kam khlemakor hakhmat ki paidbah, kat haduh ba ka la pynsheptieng ïa ka nongujor kaba don ha kane ka jaka.
U SP u la pyntip ba katkum ka ejahar, ïa kane kajuh ka jingjia ka la jia ha ka 17 tarik Nailur, 2025, ha shilynter ka surok Dhankheti Malki ha kaba u nongñiah na kajuh ka kali u la leh ïa ki kam kynshleiñ ba pohdor.
Katkum ka ejahar, la pyntip ba ha ka 23 tarik, Nailur, 2025 ha ka por kumba 8:00 baje mynmiet, ka kali Bolero rong iong ka la ieng hakhmat ka nongujor bad ka paralok jong ka hajan Don Bosco Laitumkhrah bad leh ïa ka kam pohjait shwa ban phet noh na kane ka jaka.
Ka jingjia ba la jia dang katto katne sngi katkum ka ejahar ba la ujor la pyntip ba ha ka 13 tarik, Risaw, 2025, hapdeng ka por 5:20 baje janmiet bad 5:30 baje janmiet hajan Loreto Convent, Shillong, katba ka nongujor ka dang ap ïa ka scooter Rapido, ka la shah khang kdong ha kajuh ka kali. U nongñiah u la ieng hakhmat jong ka bad pynhiar ïa ka iit kali, bad leh ïa ka kam pohjait bad khang lynti ïa ka da ka kali jong u.
Hadien ba la register ïa ki ar tylli ki ejahar ha Laitumkhrah Police Station hapoh ka Case No. 146/2025 hapoh ka section 296/79/75(2) BNS, 2023 bad Case No. 147/2025 hapoh ka Section 296/78/126(2) BNS, 2023 ki Pulit ki la phah jingtip sha baroh ki Police Station kiba don ha East Khasi Hills ban thwet bad ban ïohkem ïa u nongñiah bad ban ïoh kurup ïa ka kali.
