Shillong, Naiwieng, 13: Ka jingmynthi jong u Vice Chacellor ka skul bah North Eastern Hills University (NEHU) u Prof. PS Shukla ban wengkam mardor ia u Rohit Prasad uba la shah thung tang kum u nongtrei kontrak ha ka kam Technical Advisor, ka Joint Action Committee (JAC) kaba kynthup ia ka NEHUTA, NEHUNSA bad ka NEHUSU ha ka lah sngi U Blei ka la sdang ia ka jingiakhih kaba khlem pud sngi.
Ha kane ka sngi ba la sdang ia ka jingiakhih ba khlem pud sngi, na ka liang jong u Vice Chancellor um shym la don satia hapoh ka ophis treikam namarba u leit shuti bad la sakhi ruh ba bun na ki kamra klas ki thylli lut hadien ba ki samla pule ki la hap ban leit phai noh sha la ing na ka daw ka jingiakhih jong ka JAC.
Katkum ka jingiathuh jong u President ka JAC u Prof. Lakhon Kma, ka jingkam jong u Vice Chancellor ba u la khot iakren ia ki nongialam ka JAC ka long tang ha ki kot khubor ym da kaba phah ne pyntip sha ka JAC.
U la pyntip ba ka JAC ka sngewkhia bha na ka bynta ka lawei jong ki samla pule, hynrei ki hap ban pyrkhat ba kumno kin ialeh ban ym duh klas than ki samla pule namarba ki eksamin ruh ki la jan.
