Shillong, Nailur, 19: Ki ar tylli ki jingkieng kiba don ha Sonapur, Sonapyrdi, kata, kawei ka jingkieng ha Wah Lukha bad ka jingkieng ha Wah Umpasu ki dei ki jingkieng ki la sdang ban jot, ban pra bad khamtam ka jingkieng ha Wah Lukha ka la sdang ban tor bad lah ban kdiah ha kano kano ka por namarba bun bha ki kali heh kiba kit palat pud ki ïaid katba mon khlem da don mano mano ruh ba peitngor na ki bor synshar ka East Jaiñtia Hills District.
Halor kane, ka Jaiñtia Students Union (JSU) Narpuh Circle ha ka sngi Thohdieng ka la aiti da ka jingthoh ha u Deputy Commissioner ka East Jaiñtia Hills District ba un pynjari da ka kyndon kaba mana ïa ki kali heh ban kit palat pud.
U kyrwoh ba la phah da u President u Bah F. Lamare u la ong, “haduh mynta khamtam ïa ka jingkieng ha Wah Lukha la shu ieh kumto khlem da don mano mano ruh ban leit jurip Engineer jong ka tnat PWD (Roads) ka Sorkar Jylla khnang ban ïada ïa ka jingkieng kaba lah ban khyllem ha kano kano ka por.”
Ka JSU ka la kyrpad ïa u Deputy Commissioner ka East Jaiñtia Hills District ban phah jurip noh mardor ïa ki ar tylli ki jingkieng khnang ban ïada na ka jingkhyllem kaba lah ban jia ha kano kano ka por bad ban phah maramot khnang ba kan ym ktah ïa ka leit ka wan jong ki paidbah ha ka leit ka wan bad ka rah ka rong.
Haba pynpaw ba ka jingkieng ha wah Lukha bad ka jingkieng ha Wah Umpasu ki long kiba kongsan bha, ka JSU ka la ong, “lada shu ieh shrah kumto khlem phikir kan sa poi por ba ki jingkieng kin sa kdiah bad kan ktah ïa ka leit ka wan ki paidbah.”
Ka seng ka la pyntip ruh ba u Deputy Commissioner u la kular ba un sa shimkhia ïa ka jingujor jong ka seng ban phah jurip noh mardor.
Ka JSU ka la phah ruh ïa ka jingthoh sha ka NHAI, Chief Engineer PWD (Roads) Sorkar Meghalaya, Executive Engineer, PWD (Roads) NEC Division, East Jaiñtia Hills District bad District Transport Officer, East Jaiñtia Hills District kum ka jingpyntip halor ka jinglong jingman jong kitei ki ar tylli ki jingkieng.
