Shillong, Jymmang, 21: Ki nongïalam jong ka Khasi Student’s Union (KSU) War-Jaintia Circle ba la lam khmat da u Asst. Secretary samla Mechanki Syngkon bad u Organising Secretary samla Block Tariang ki la aiti da ka dorkhas ha ka SDO Amlarem Civil Sub Division hadien ba ki paidbah ka thain ki la pynsngew sha ka seng halor ka jingshah ktah ki tyllong um na ka daw ka jingtuid ka um jaboh kaba mih na u dewïong ba la shu ieh bun bun snem ha ki jaka ba la lum thup.
Ka jingpynsngew jong ka seng ka long namarba kane ka buh jingma ïa ka koit ka khiah jong ki nongshong shnong ha ka thaiñ Amlarem bad ka seng ka la kyntu ïa ka SDO ban tuklar halor ki jingbuh pathar ïa u dewïong ba la shu slem ha kiba bun ki jaka bad ha ki bynta jong ka surok Amlarem – Dawki.
Na ka daw ka jinghap jong u slap ka um kaba tuid na u dewïong ka la ktah ïa kiba bun ki tyllong umbam umdih kumjuh ruh ïa ki jingthung jingtep.
Ka KSU ruh ka kyntuh ïa ka SDO ban bthah ïa ki trai jaka bad ïa ki trai dewïong ban pynkynriah noh bad ban buh ha ki jaka kiba biang khnang ban ym ktah ïa ka koit ka khiah ki nongshong shnong.
