Shillong, Nailar, 08: U Block Development Officer (BDO) ka Mawryngkneng C&RD Block Bah A. Lyngdoh ha ka sngi Thohdieng u la plie paidbah ïa ka ïew die soh Watermelon ha phyllaw ka ophis jong ka Block bad kan long ruh ka sien ka banyngkong eh ban pynong ïa kane ïew die soh ba la wanrah da ki nongrep na ka shnong Mynriang, East Khasi Hills District.
Ka jingdie paidbah ïa u soh ka long hadien ba ki nongrep ka shnong Mynriang ki la phaikhmat bha ïa ka kam rep soh Watermelon ha kine ki san snem ba la dep bad haduh ba mynta ka shnong Mynriang ka la paw kum ka nuksa ba khraw ha ka rep soh ha ka thaiñ.
Ha kane ka sngi ki paidbah najan bad najngai kiba la wan sakhi ki la ïoh mad ruh ïa u soh Watermelon uba thiang.
U BDO ka Mawryngkneng Bah A. Lyngdoh u la ong ba ka jingpynlong ïa kane ka ïew ka dei ka thong ban plie lad ïa ki nongrep ba kin ïoh pynïaid iew ïa u soh bad ban kyntiew ïa ka jingïoh kamai bad ïa ka ïoh ka kot jong ki nongrep soh Watermelon ha ka shnong Mynriang.
U la ai jingkyrmen ba lyngba ka jingïatreilang hapdeng ka ophis jong ka Mawryngkneng C&RD Block, ki shnong bad ki paidbah, ka jingrep ïa u soh Watermelon kan nang roi bad ki nongrep kin ïoh ruh ban die sha ki ïew bad ki jaka ba kham jngai.
Ki nongshong shnong ka shnong Mynriang ki la pynpaw ka jingsngewnguh ïa ka ophis u BDO ka Mawryngkneng C&RD Block halor ka jingkyrshan bad ka jingïarap ban pynlong ïa ka ïew kum ka jingplie lynti bad ka jingsdang ban pynkiew ïa ka kam rep jong ki.
