Shillong, Nailar, 28: Da ki spah ngut ki samla shynrang bad kynthei kiba thmu ban thep ïa ka kam ha ka tnat shipai Border Security Force ha ka sngi Palei ki la pynshlei smam ïa ka Soso Tham Auditorium, Shillong tang shu ai jingtip na ka ophis jong ka Deputy Commissioner ka East Khasi Hills District.
Dang shen ka tnat shipai BSF ka la pynmih ïa ka Advertisemet kaba pynbna ïa ka jinglait 300 tylli ki kam ha ka General Duty kaba long thik tang na ka bynta ki Schedule Tribe jong ka Jylla Meghalaya.
Katkum ka jingpynbna, ki kam kiba lait ki long 191 na ka bynta ki shynrang bad 34 na ka bynta ki kynthei, bad na ka bynta ki Border District ka Jylla Meghalaya ki kam kiba lait ki long 64 tylli na ka bynta ki shynrang bad 11 tylli ïa ki kynthei.
U Commandant Establishment jong ka tnat shipai BSF u Rajiv Kumar Sharma haba kren ha ka jingïalang, u la ai jingbatai sha ki samla kumno ban thep ïa ka kam bad na ka liang jong ka ophis ka Deputy Commisisoner la mihkhmat da u Additional Deputy Commissioner u Bah S. Warjri uba la ai jingpynshai bad ban pynsngewthuh da ka ktien Khasi nalor u Colonel Sebastian Marbaniang uba dei u Zila Sainik Welfare Officer.
U Rajiv Kumar Sharma ha ka jingïakren bad ki lad pathai khubor u la ïathuh ba ki 300 tylli ki kam kiba lait ha ka tnat shipai BSF ka long tang ïa ki Schedule Tribe na ka jylla Meghalaya bad u la kyntu ruh ïa ki samla kiba angnud ban thep ïa ka kam kin leit thep ïa ki aplikeshon ha ka shlem treikam jong ka tnat shipai BSF kaba don ha Mawpat, Shillong.
U Bah S. Warjri u la ïathuh ba ka Office jong ka Deputy Commissioner shen kan sa pynkhreh ban pynlong ïa ka Coaching Class na bynta ki samla kiba hap ban thoh ïa ka eksamin kam shipai bad ïa ka jingtip kaba bniah yn sa ai jingpynbna kham hadien.
