Shillong, Risaw 22: Ka Hynñiewtrep Integrated Territorial Organisation (HITO) ha ka sngi Ba-ar ka la leit ban tur paidbah sha ka ophis treikam jong ka Meghalaya State Pollution Control Board (MSPCB), Shillong. Shwa ban poi ki dkhot ka HITO ki Pulit ki la ap lypa ha khyrdop jong ka Board ban khanglad ia kino kino ki jingjia ba lah ban mih ha kane ka sngi.
Kane ka jingtur paidbah ka long kum ka dak ban pynpaw ïa ka jingpyrshah halor ka jingjia ha ka 18 tarik mynta u bnai ha ka Public Hearing jong ka MSPCB ha ka shnong Wahïajer, East Jaiñtia Hills District namar ka jingbym ailad ban rung sha ka Public Hearing ia ki kynhun kiba pyrshah.
Ha kaba ïadei bad kane, ka public hearing ka dei kaba la pynlong na ka bynta ban seng ïa ka karkhana dewbilat Meghatop Cement Pvt Ltd ha ka shnong Wahïajer.
Ki kynhun Sengbhalang kynthup naduh ka KSU, FKJGP, HYC bad HITO, kila shah pakhang lynti ha ki volunteer jong ka shnong Wahïajer, ba kin leit ïashimbynta ha ka Public Hearing bad kumjuh ruh ïa baroh ki briew kiba pyrshah ïa ka kompeni Meghatop Cement Pvt Ltd ban seng karkhana.
Ha ka jingiakren bad ki lad pathai khubor u President jong ka HITO u Bah Donbok Dkhar ula ong ba ka jingïatur paidbah sha ka ophis ka MSPCB ka long na ka bynta ban dawa ba dei ban pynlong biang da kawei ïa ka public hearing jong ka Meghatop Cement Pvt Ltd.
“Ngin ai por tang shi taïew ïa ka MSPCB ban kheiñ iap noh ïa ka Public Hearing ba la pynlong ha ka 18 tarik mynta u bnai bad ban pynlong biang da kaba thymmai,” ong u Bah Dkhar.
Ka Seng ka la byrngem ruh ba lada ka MSPCB kam leh eiei hapoh kane ka shitaïew ba la aipor, ka HITO ka la pynkhreh ban leit ujor da ka mukotduma sha High Court.
