Shillong, K’lyngkot, 23: Ki nongdie madan kiba don hapoh ka shatri jong ka Meghalaya Greater Shillong Progressive Hawkers and Street Vendors’ Association (MGSPHSVA) ha ka sngi Thohdieng ki la tur sha ka ophis treikam jong ka Shillong Municipal Board ryngkat ki plakad ban pyrshah ïa ka jingpynbna ba la pynmih dang shen na ka bynta ban pynkynriah lut ïa ki nongdie madan na Khyndai Lad naduh ka 7 tarik, Rymphang,
Tang hapoh katto katne kynta u Chief Executive Officer (CEO) ka Shillong Municipal Board u la phah da ka jingthoh sha ki nongïalam jong ki nongdie madan ban pyntip ba ka jingïalang jong ka Provisional Town Vending Committee yn sa pynlong ha ka 5 tarik, Rymphang ban ïakren ïa ki mat kiba ïadei bad ki nongdie madan.
Ka dkhot jong ka MGSPHSVA ka Kong Angela Rngad ka la buh jingkylli la kane ka jingpynbna ka shongaiñ bad ka don neem ka jingleh hok bad pynpaw ruh ba kane ka mat ka dei kaba hap hapoh ka Street Vendors (Protection of Livelihood and Regulation of Street Vending) Act, 2014.
Ka la buh jingkylli ruh ïa ka jingithuh ïa ka jaka ba la shim rai tang na kawei ka liang ba kynthup ha parking lot ka MUDA ha Khyndai Lad bad ka khrum jong ka parking Lot hajan ka State Bank of India khlem da ïasyllok shwa ïa ki nongdie madan lane ïa ka Provisional Town Vending Committee.
Haba pynpaw ka jingsngewkhia ban ïoh jingtip ba ka la don ka jingmang pisa kaba 6 klur ban shna ïa ki dukan, ka Kong Rngad ka la buh jingkylli da kaba ong, “shano ka jingtreikam kaba shai ha kaba shim ïa ka rai bad ha kaba ai ïa ka Kontrak ban shna ïa ki dukan.”
Ka Kong Rangad ka la pynkynmnaw ruh ïa ka jingbym don jong ka Town Vending Committee (TVC) ba pura ha Meghalaya, katkum ba la kdew ha ka aiñ. Hynrei la thaw ïa ka TVC ba shipor ïa kaba la pynbna ha u Naiwieng, 2022 da kaba buh ruh ïa ki kyndon treikam, kata, ka jingpynlong ïa jingsorjamin, ka jingkam bad ka jingpyrshah, ka jingai ïa ki vending license bad ka jingithuh ïa ki jaka ba dei ban shong ki nongdie madan. Wat hapdeng kane, ka jingtreikam jong ka TVC ka long ka bym biang satia.
Ka la ong, ha u Nohprah, 2022, ka Provisional TVC ka la pynbeit ban pynlong ïa ka jingsorjamin ïa kaba la kyrshan ruh da ka MGSPHSVA kaba la dawa ban pynlong ïa ka Digital Survey khnang ban pynthikna ba ka jingtreikam kan long kaba khuid bad kaba shai. Ka jingtyrwa ïa ka Digital Survey kan ailad ïa ki nongdie madan ba kin ïoh peit ïa ka jingsorjamin lyngba ki SMS, ka WhatsApp, ne kano kano Website kaba dei. Hynrei, ka jingsorjamin kam shym la urlong na ka daw ka jingdkoh ha ka jingtreikam.
Ka Kong Rngad ka la kynthoh ruh ïa ka Sorkar ka bym shym la sngap ïa ka jingtyrwa jong ka Association ban pyrshang da ka Digital Survey kumba la leh ha Delhi bad ha ka jylla Himachal Pradesh ka bym don jinglutksan eiei. Ka Kong Rngad ka la kynthoh shuh shuh da kaba ong ba ka Sorkar ka jied da ka lynti ban pynsyrwa kai ïa ka pisa jong u paidbah ha ki kam ki bym seisoh eiei ruh em,
Ka la pynrem ruh ïa ka rai jong ka Sorkar ban pynkynriah ïa ki nongdie madan khlem da bud ryntih ïa ki kyndon kum ha kaba pyndep ïa ka jingsorjamin, ka jingsngap ïa ka jingkam bad ka jingpyrshah, ka jingai ïa ki Vending Certificate.
