Shillong, ïaïong, 06: Ka leit ka wan jong ki kali ha surok Shillong-Dawki ka la thud ha ka step sngi u Blei na ka daw ka jingtwa kynsan jong ka khyndew harum ka shnong Laitlyngkot shwa ban poi ha ka shnong Pomlum.
Kane ka la jia hapdeng ka por 10:45-11:00 baje mynstep ha kaba ka khyndew bad ki maw kiba heh ki la twa kynsan najrong lum bad ha kane ka jingjia la ong ba ym shym la don satia kano kano ka jingjia ba sngewsih namarba ka jingtwa jong ka khyndew ka la jia ha ka por ba ki kali la ïaid lait na kane ka jaka.
Bun ki kali kiba thmu ban leit sha ka thain Pynursla bad na ka thaiñ Pynursla sha Shillong ki la hap ban sangeh hapdeng lynti namar ka khyndew bad ki maw ki la khang syndon sbak ïa ka surok.
La ïathuh ba ka kali puh shilum jong ka tnat PWD ka dang poi sha kane ka jaka ba twa ka khyndew haduh ka por 12 baje shiteng sngi ban pynkhuid bad ban khat ïa ki maw bad ïa ka khyndew khnang ban pyllait ïa ka leit ka wan jong ki kali ha kane ka surok kaba ki kali ki ju ïaid baroh 24 kynta.
Ki kali Tourist kiba thmu ban hiar sha ka thaiñ Riwar Pynursla bad Dawki ki la hap ban phaidien noh na ka daw ka jingtwa jong ka khyndew kaba la pynsyier mynsiem ïa ki nongshang kai suwari bad ïa ki nongleit nongwan.
