Shillong, Rymphang, 19: Kumba hynñiew ngut ki khynnah skul ki la mynsaw jur hadien ba kawei ka trok kaba don ïa u nombor NL-01 AA-4672 ka la leit ban tynrah nadien jong kawei ka School Bus jong ka Mt. Zion Higher Secondary School, 15 Mer Byrnihat, katba ka dang ap ban shaw ïa ki khynnah skul ha 17 Mer.
Ha kane ka khyllipmat, ki don lypa kumba 20 ngut ki khynnah skul ha ka por ba ka trok kaba kit ïa u Clinker ka la leit ban tynrah ïa kane ka School Bus ha ka por kumba 8 baje mynstep ha ka sngi Palei.
Ïa ki 7 ngut ki khynnah skul kiba la mynsaw jur la pynkit noh ïa ki sha Guwahati ban ïoh jingsumar kaba kham kloi katba ïa kiba mynsaw malu mala la pynkit sha Byrnihat PHC ban ïoh jingïarap.
Tang shu ïoh jingtip halor kane ka jingjia, ki Pulit ka Byrnihat Police Outpost ki la leit ban pynlong ïa ka jingtohkit bad la ïathuh ruh ba u nongñiah jong ka trok u la pyrshang phet hadien kane ka jingjia hynrei ki Pulit ki la kem noh ïa u ban pynlong ïa ka jingtohkit kaba bniah.
