Shillong, Jymmang, 22: Ka Chapter ha ka sngi Palei ka la pynmih paidbah ïa ka draft jong ka People’s Education Policy (PEP) 2025 ha nongbah Shillong ka ban mih bujli ha ka jaka jong ka National Education Policy (NEP) 2020.
Ha ka jingïakren bad ki lad pathai khubor, u President ba shipor ka AISEC Meghalaya Chapter Bah Samborlang Dkhar u la ong, ka jingthmu jong ka draft PEP 2025 ka long ban pyrshah ïa ka NEP 2020 kaba la pdiang da ka Sorkar Pden haba ka ri ka dang don hapdeng ka jingkhangdam na ka jingwan lynshop ka jingpang khlam COVID-19.
U Bah Dkhar u la ong shwa ban pdiang ïa ka NEP, ka Sorkar Pdeng kam shym la wanrah ha parliament ban ïathir ïatai.
U la kynnoh ba ka NEP 2020 kan pynjot ïa ka pule puthi ha ka ri India baroh kawei bad dei na kane ka daw ba ka AISEC ka la wanrah da ka draft PEP 2025 ha ka jaka jong ka NEP.
“Kumba long ha baroh ki jylla jong ka ri, ka AISEC Meghalaya Chapter mynta ka sngi ruh ka la pyllait paidbah ïa ka draft PEP 2025 ban bujli ïa ka NEP 2020” ong u Bah Dkhar.
Katba u Secretary jong ka AISEC Meghalaya Chapter Dr. Batskhem Marboh u la ïathuh ba ïa ka Meghalaya Chapter la thaw ha u snem 2024 hadien ka jingïasyllok bad ki nongïalam ha ka ri bad ki nongïalam na ka jylla Assam kum shi bynta ka jingpynkhih ha ka ri India pyrshah ïa ka NEP 2020.
U Dr. Marboh u la kynnoh ba ka NEP kaba pynshlur ïa ka pule puthi ban pnlong kam khaii ha ka ri ka la pynlong ïa ka Committee ban ïathir ïatai sani bad ki briew kiba don kajuh ka jingmut, kajuh ka jingthmu ban ïada ïa ka pule puthi ha ka ri.
“Ka AISEC ka buh ïa ka Draft PEP na ka bynta ka jingïakren bad jingïamir jingmut ha ka ri baroh kawei, ym kum ka NEP 2020 kaba la pynjari najrong khlem kano kano ka jingïaphylliew jingmut hapdeng ki riewshemphang bad ki prohjabieng ha ka pule puthi, ki riewstad, ki nonghikai bad ki samla pule,” ong u Dr. Marboh.
U la ong ba ka AISEC ka pdiang sngewbha ïa baroh ban ïadon bynta lang ha ka jingïakhih ban pynim ïa ka pule puthi ha ka ri na ka jingshah rahbor da mano re mano ne ki bor kiba bym don ka jingsngewkhia ïa ka pule puthi.
U la bynrap ruh ba ka AISEC ka dang rah ïa ka Draft PEP 2025 sha ki bynta bapher bapher jong ki jylla bad pan ïa ki jingai jingmut ban pynbha shuh shuh ïa ka draft.
“Hadien ba la ïoh ïa baroh ki jingai jingmut, ka AISEC kan sa rah ïa ka hakhmat ka National People’s Parliament ban khot na ka bynta kane ka jingthmu ha u bnai Kyllalyngkot, 2026 ha Bengaluru kum ka lad ban bujli ïa ka NEP bad ban dawa ba dei ban pyntreikam ïa ka na ka Sorkar Pdeng bad ki jylla hapoh ka por ba la buh,” u la bynrap.
