Shillong, Naitung, 16: Ka Chairperson jong ka Meghalaya State Commission for Child Rights (MSCPCR) ka Agatha K Sangma ka la pan jingïarap na u Myntri Rangbah ka jylla u Conrad K Sangma bad na u Myntri ka tnat Social Welfare u Bah Paul Lyngdoh na ka bynta ban shna ïa ki jaka ïalehkai jong ki khynnah rit bad ban wanrah ïa ka Standard Operating Procedure (SOP) khnang ban pynthikna ïa ka jingshngaiñ bad ka jingïada ïa ki khynnah kiba leit shabar ka jylla.
Ka SOP kan treikam na ka bynta ki kynhun bad ki riewshimet ba ki dei ban bud ïa ki kyndon ba la buh haba ki ïalam ïa ki khynnah rit shabar ka jylla.
“Nga la ïakynduh ïa u Myntri Rangbah bad ïa u Myntri ka tnat Social Welfare mynta ka sngi ban shna ïa ki jaka ïalehkai jong ki khynnah rit ha ki sor jong ngi,” la ïathuh ka Agatha ha ka jingïakren bad ki lad pathai khubor ha ka sngi Balang.
Ka Chairperson ka la pynshai ruh ha u Myntri ka tnat Social Welfare ïa ka rai ba la shim ha ka jingïalang kaba dang shen bad ki tnad bapher bapher kynthup ïa ka tnat Pule Pputhi, Pulit, Aiñ, ka Koit ka Khiah bad kiwei kiwei halor ka jingdonkam ban wanrah ïa ka SOP na ka bynta ka jingshngaiñ jong ki khynnah kiba leit shabar ka jylla ne kiba ïalam da ki riewshimet ne ki kynhun
“Ki hap ban don ki katto katne ki SOP kiba ki dei ban bud namar bunsien ki khynnah ki shah ïalam bad ka sorkar kam tip wat ïa kane bad tang haba la jia kaei kaei kaba sngewsih ngi ïoh jingtip halor kane. Kumta ngi donkam ban khanglad, da kaba pynthikna, ba ka jinglong jingman ka long kumta ngi tip pura shano kine ki khynnah ki don, ha kiei ki jaka ki im bad ki jait shlem pule aiu la phah ïa ki. Hato ki dei ki jaka pule ba la ithuh da ka sorkar, wat ki hostel ruh hato ki dei kiba la ïoh jingbit na ka sorkar,” ka la ong.
Haba kylli, ka Chairperson kala ong, “ka dei ka jingai jingmut jong ka Commission ba ngi dei ban don ïa ka SOP bad ngi la shim ïa ki tnad bapher bapher bad shim ïa ki jingai jingmut jong ki halor kano ka jait SOP kaba dei ban shna bad nga kyrmen ba ka Sorkar kan pyntyllun ïa ka shakhmat. Shisien ba ngi la don ïa ka SOP ngin sa don ha ka kti ïa ka thup jong ki jaka pule namar kin hap ban bud ïa ka SOP shwa ban ïalam ïa ki khynnah shabar ka jylla.”
Ka la pyntip ba ka MSCPCR ka la pynlong ïa ki prokram ban pynsngewthuh ha ki skul shaphang ka hok jong ki khynnah, ka jingshah lehbeiñ ki khynnah ha ka long rynïeng bad ka jingshah lehbeiñ ha la ïing la sem.
Ka Agatha ka la banjur ïa ka jingdonkam ban thaw ïa ka jaka kaba biang ha kaba ki briew ki lah ban pyntip ïa ki jingjia shah thombor bad ka jingshah leh bym hok.
“Ka la don ka jingjia kaba dang shen ha kaba kawei ka kmie ka la kyntait ban ujor ejahar namarba u nongleh kam bymman u dei u bahaïing hasem jong ka longïing. Kumta, ha kum kine ki jingjia, ngi donkam ban mih shakhmat bad ong ba kane ka long kaba bakla bad ka Commission kan tuklar, ki Pulit kin tuklar bad ka longïing kan hap ban ïatreilang ban pynthikna ba phin ym sngap jar ïa kine ki jait jingjia bad phim lah ban ñiew ruh ïa ki kum ki lanot hynrei kum kiba lait im,” ka la ong.
Haba pynpaw ïa ka jingsngewkhia halor ka jingkiew ki kam runar ruser pyrshah ïa ki kynthei bad khynnah, ka Chairperson ka la pynpaw ba kane ka jingeh ha ka imlang ka sahlang ka donkam ïa ka jingïatreilang na baroh.
Ka la banjur ïa ka jingdonkam jong ki nonghikai, ki longïing longsem bad ka imlang sahlang baroh kawei ban don bynta ban ïada na ki kam runar.
