Shillong, Lber, 22: Ki nongïalam jong ka Khasi Students’ Union (KSU), ha ka sngi Saitjaiñ ka la pdiang burom ïa ki nongmihkhmat na bar ri kiba ïashim bynta ha ka 23rd International Shillong Trade Fair kaba la long ha madan Iewrynghep, Laitumkhrah Shillong da ka jingthmu ban wanrah ïa ka jingïadei bad kiwei ki ri ka pyrthei ha ka ïoh ka kot.
Ki nongmihkhmat nabar ri ki kynthup na ka ri Turkey, Afghanistan, Iran, Thailand, Lebanon, Ghana, bad Egypt kiba la ïashim bynta ha kane ka iew ïadie ïathied nalor kiwei pat ki nongïashim bynta na kylleng ka ri India bad na kane ka thaiñ Shatei Lammihngi.
Kane ka iew ïadie ïathied ka la sdang naduh ka 5 tarik mynta u bnai bad kan sa kut noh ha ka 26 tarik mynta u bnai.
Ïa kine ki nongmihkhmat na bar ri la pynlong ïa ka jingïakynduhlang kaba kyrpang ha Shillong Club ba la lamkhmat da u General Secretary u samla Donald V. Thabah.
Ha ka jingïalang, la ïadonlang ruh u Vice President ka KSU u samla Biangbor Paliar, u Assistant Secretary samla Reuben Najiar bad u Finance Secretary samla Manly Nongpluh.
Ki nongïalam ka KSU ki la ai sngewbha ïa ki nongmihkhmat na bar ri da ki momento, ka ryndia bad u paila kum ka dak ka jingpdiang burom ïa ki sha kane ka jylla.
Haba kren ha kane ka sngi, u samla Donald Thabah u la ong, “katba ngi dang peitngor bha ïa ki jingeh kiba mih na ka jingwan rung kyrthep ki mynder ri, khamtam na ki ri kum ka Bangladesh bad Nepal, hynrei ngi sngewkmen ban pdiang sngewbha ïa ki nongmihkhmat nabar ri kiba ïashim bynta ha kane ka iew ïadie ïathied. Ngi ngeit ba ka jingdon jong ki kan ïarap shibun ïa ka roi ka par jong ka Meghalaya.”
U la pynshlur ruh ïa ki nongwan ban wad bniah ïa kiwei pat ki bynta jong ka jylla bad ban lap ïa ki jinglah jong ka ha ka kam jngohkai pyrthei.
U samla Thabah u la pynsngew ruh ha ki nongmihkhmat na bar ri ïa ka histori jong ka KSU bad ka jingshimkhia kaba la slem bha ban pynneh pynsah ïa ka jinglong tynrai jong ka jaitbynriew Khasi
Haba pynpaw ïa ki jingeh ba ka jylla ka ïakynduh, u General Secretary ka KSU u la pynpaw ïa ka jingsngewkhia halor ka jingdon ki samla pule kiba pep skul shiteng por, ka jinghiar ka ïoh ka kot, ka jingkiew ha ka jingbym ïohkam ïohjam ki samla kiba la nang la stad.
U Vice President jong ka Shillong Trade Fair, Rajesh Das u la pynpaw hakhmat ka KSU ban pdiang ïa ka jingthmu ban buh ïa ka Civil Services Coaching Institute ha Shillong ban ai jingkyrshan ïa ki samla kiba wan na ki longiing kiba kham duna ka ïoh ka kot. U la tyrwa ruh ban buh ïa ka Counselling Centres na ka bynta ki samla khnang ban ïarap ïa ki samla kiba dang angnud shuh shuh ban bteng ïa ki jingpule kiba kham shalor shabar ka jylla.
U Das u la pynpaw ka jingsngewnguh ïa ki nongïalam ka KSU na ka bynta ka jingpdiang sngewbha jong ki bad kular ban pynneh pynsah ïa ka kolshor bad ki jinglong jong ka jylla Meghalaya.
U General Secretary jong ka Shillong Trade Fair u Mit Das, u la bynrap ba ka KSU ka lah ban ïatreilang bad ki tnad treikam ka Sorkar Pdeng ban sdang ïa ki prokram pynroi ïa ki sap ki phong, kaba nang pynkhlaiñ shuh shuh ïa ka jingpynkup bor ïa ki samla ha ka jylla. U la ai jingmut ruh ban sdang shuh shuh ïa ki ITI, khnang ba yn dup lah ban pynmih shuh shuh ïa ki samla kiba tbit ha ka jylla.
Ha ka jingïamir jingmut katto katne ngut ki nongmihkhmat nabar ri ki la ai jingmut ban sdang ïa ki International Exchange Programme ban kyntiew ïa ka pule puthi bad ban wanrah ïa ka jingdei kaba jan hapdeng ka jylla Meghalaya bad kiwei kiwei pat ki ri.
