Shillong, K’lyngkot, 09: U Assistant Secretary jong ka shnong Laitnongkseh u Bah Purningstar Shabong u la kynnoh ba u Acting Lyngdoh jong ka Hima Sohïong u la pyndonkam ïa ka hukum jong ka Khasi Hills Autonomous District Council kum ka jaiñ ñiad kjat.
Ha ka jingïakren bad ki lad pathai khubor hadien ka jingïakynduh ïa u Executive Member uba khmih ïa ka tnat Elaka ka District Council ha ka sngi Thohdieng u Bah Purningstar Shabong u la ong, “ka la don ka hukum ba la bthah ïa ka Hima Sohïong bad ïa ka Raid Nongkseh ban pynlong ïa ka elekshon ha ka shnong Laitnongkseh bad la aipor kumba 15 sngi hynrei u Acting Lyngdoh u pyndonkam ïa ka hukum jong ka KHADC kum ka jaiñ naid kjat. Ki bun ki Hukum halor ka Voter List kaba ka Hima ka dang shu buh haduh mynta kam pat leh eiei.”
U la kynnoh ruh ba u Acting Lyngdoh bad u Lyngdoh jong ka Raid Nongkseh kim shym la burom satia ïa ka jingpynmih hukum da ka District Council ban pynlong ïa ka elekshon jied Rangbah Shnong ha ka shnong Laitnongkseh kaba la wanrah shibun ki jingeh ïa ki paidbah nongshong shnong ha kiba bun ki liang.
U la ong ba ka jingbym ai Sanad jong ka Hima ïa u Rangbah Shnong ba la jied da ka sur jong ki paidbah bad ka jingthung pynban da u Acting Rangbah Shnong, u la long pynban kum u atiar uba pynthud lut ïa ki kam pynroi hapoh ka shnong bad ïa ka skhim 100 sngi kaba la buh jingeh haduh katta katta ïa ki paidbah.
U la ïathuh ba u Executive Member ka Council u la kular ba un sa shimkhia ban leh eiei noh mardor halor kane ka jingud jingnam jong ka Dorbar Shnong.
Haba kylli, u Bah Shabong u la ong, “naduh u snem 2023 ka Dorbar Shnong ka ladep jied ïa u Rangbah Shnong uba la mon hi da ki paidbah hynrei u Lyngdoh ka Hima uma shym la ai Sanad da ai kaba bun ki daw.”
“Ngi la buh jingthoh sha ka Hima bad sha ka KHADC bad ka KHADC ruh ka ladep khot ïa ka jingpynsngew hynrei mynta kane ka kam ka la sahteng la lai snem kynthih namarba ka KHADC ka ñiat sha ka Hima bad ka Hima ka khynñiat sha ka KHADC,” la ïathuh shuh shuh u Bah Shabong.
