Shillong, Nailar, 13: Ka Hynñiewtrep National Liberation Council (HNLC) ha ka sngi Baar ka la kynmaw burom ïa ka lyngkhuh sngi ïap kaba lai snem jong nongïalam, u nonghikai, bad u nongpeit jngai ka seng u Bah Cherishstarfield Thangkhiew.
“La seng (ïa ka HNLC) ha u snem 1987 da u Bah Cherish, Sounder Cajee, Founder Cajee, John Kharkrang, Julius Dorphang, Vincent Sangma bad kiwei kiwei kynthup uwei u ophisar shipai India uba la shongthait bad uwei u Bank Manager,” ong u kyrwoh ba la phah da u General Secretary cum Publicity Secretary ka HNLC u Bah Saiñkupar Nongtraw.
“Ka HALC ka la kylla noh sha ka HNLC ha u snem 1997, katba ki paralok Garo na ka HALC ki la seng noh ïa ka ALMA. U Bah Cherish u dei tang ma u na ki nongseng ïa ka HNLC u bym shym la pyndem ïa la ki nongrim ne die ïa ki briew lajong,” la ong u kyrwoh.
“Katba nang mih ki sngi, bun na ki nongïalam jong ngi kiba shlur bad kiba stad ha ka jingmut jingpyrkhat ki la kylla sohpdung. Uwei hadien uwei, ki la shah pynïaid, ki shah pynkylla ka saiñpyrkhat, shah pynkbum bad shah thied ban pyntroiñ ïa ki kynhun u Hynñiewtrep katba ki Agent sorkar ki nang bsut bad pynthut ïa ki rukom treikam jong ki. Watla ha ki snem 80 bad 90 ba la sakhi ïa ki sur kiba bun kiba kyrshan ïa ka jingsngewsih bad jingjynjar jong ngi lang, hynrei tang khyndiat eh ki dang sah haduh kine ki sngi,” la ong shuh shuh u kyrwoh.
“U Bah Cherish u ju ong ïa nga ba ym don ka spah ne ka burom kaba kham khraw ban ïa ka jingpyllaitluid. Dei ma u, uba la wanrah ïa ka jingmut ban ïakhlad bad u la pule bniah ïa ki jingïaleh jong u Wickliffe Syiem. U Bah Cherish u long u riew shemphang u bym ju pynïakhlad ïalade na ki paidbah. U la ïoh ïa ka kyrteng “u nongpynkylla dur” hapdeng ki katto katne ki nongïalam jong ka thaiñ Shatei Lammihngi namar ka jinglah jong u ban treikam da kaba rieh ha ka nongbah Shillong, kaba la pynkulmar ïa ki bor ka aiñ bad ki bor sorkar,” la ïathuh u Bah Nongtraw.
“Da kaba shaniah tang ha ki politishian bad kiwei kiwei ki riewstad ban ïasaid ïa ka kam jong ka ‘Jaidbynriew’, ngin hap ban ap slem. Bun ki nongmihkhmat bad ki politishian jong u Hynñiewtrep kiba don pisa hynrei kim don ka jingïatylli; kim kwah ban ïadonlang ha ka liang ka ïoh ka kot ban tei ïa la ka jong ka imlang sahlang. Ka pisa kaba ngi pynlut manla ka sngi ka ïaid tang shisien ha ka shnong ka thaw jong ngi, hynrei katba nang bun ka pisa ka ïaid 19 – 90 shah ha ka pla jong ki bym dei ki riewlum. Ka Sorkar kam don ïa ka jingthmu jong ka ïoh ka kot; kum ka khih ka kamai, ki briew jong ngi ki sahduk, ki ritpaid bad ka Meghalaya ka la kylla long ka jylla kaba poh kyrdan ha ka ri India,” la kynthoh u Bah Nongtraw.
“Katba ngi dang sngewsih ïa ka jingduh noh ïa u nongïalam uba tbit, ka pateng jong u ka dang neh. Kumba leh ki longshuwa jong ngi, u Bah Cherish u la iehnoh ïa ka lynti na ka bynta ka jinglaitluid jong ngi. Ki nongshun ki lah ban pynïap ïa u da u kuli, hynrei kim lah ban pynduh ïa ki saiñpyrkhat jong u,” la bynrap shuh shuh u kyrwoh na u Bah Nongtraw.
