Shillong, Nailar, 08: Da ki phew ngut ki nongdie madan ha ka sngi Thohdieng ki la rah plakad ha Khyndailad ban dawa ïa ka Shillong Municipal Board (SMB) ban ai noh ïa ka Certificate of Vending (CoV) namarba haduh mynta ki nongdie madan ki bym pat ïoh ïa kane ka syrnot kim pat ïoh jaka shong die jingdie.
Dang shen ki nongdie madan kiba la ïoh ïa ka CoV ki la leit kynriah sha ki dukan thymmai ba la pynshna kyrpang da ka Sorkar ha Parking Lot, ka Meghalaya Urban Development Authority (MUDA).
Katkum ka jingïathuh jong ki nongïalam ka Shillong Roadside Hawkers’ Association (SRHA) bad ka Meghalaya Greater Shillong Progressive Hawkers and Street Vendors Association (MGSPHSVA) ki nongdie madan kiba ju im kamai jakpoh ha Khyndai Lad ki bym pat ïoh ïa ka CoV ki don sa kumba 100 ngut.
Ha ka jingïakren bad ki lad pathai khubor uwei na ki rangbah uba ju shong die madan ha Khyndai Lad u la ong, “ngi wan kit kriah kumne dei ba ki thngan ki khun, lada ym dei ba thngan kin khun ngin ym wan kit kriah kumne.”
Kawei pat ka nongdie madan ka la ong, “kiwei kiba don duna heh bad kiba don dukan sha Iewduh ki ïoh CoV ban shong dukan hangne balei ïa ngi pat kiba la shong die madan ha Khyndai Lad da ki phew snem ngim pat ïoh satia ïa ka CoV.”
“Ngi sngewsih. Ïa ngi kiba dei hok ngim ïoh,” ka la ong.
‘U don u bar jylla uba don dukan sha Iew bad u don uwei ruh uba don dukan shathie sharum u don dukan hangne. Balei ki ai ïa ka laisen ïa kita kiba la don dukan. Mynshwa ki ong ban pynrung ïa ki ngi kiba dei madan hynrei mynta pat ki wan shong da kiwei ki briew,” la bynrap ka nongdie madan.
“Ngi la shong die madan mynta la bun bun snem, ngi tip shai ba kim (bar jylla ba don dukan sha iewduh bad ba don dukan heh) kim dei satia ki nongdie madan. Hynrei mynta hapoh ki shong da kiwei pat ki briew,” la bynrap lang sa kawei pat ka nongdie madan.
“Mynta la shi bnai ngi la shu shong ha iing, ngin bam da kaei? Ka bai skul, ka bai bam naei ngin pynmih?” la kren bynñiaw ki arngut ki longkmie kiba ju im kamai da kaba die madan.
“Katba ngim pat ïoh ïa ka CoV ngin wan shong beit hangne,” ki la ong.
Ka Kong Angela Rngad kaba long ka nongïalam jong ka MGSPHSVA ka la ong, “ngi pyrshah ban rung shane (sha Parking Lot) namarba ngi tip ba ym pat biang lut ki kam ki jam. Naduh ka 17 tarik Naitung, hadien ba la pynmih hukum ka Iingbishar kim shym la shah shuh ïa ki (nongdie madan) ban shong ha surok. Ïa kiba khlem ïoh CoV leilei naduh ka 17 tarik, Naitung, ki khlem ïoh shuh wat ban die jingdie katkum ka por ba la bthah da ka Iingbishar.”
“Mynta ka la long shi bnai ba ki dang don katto katne kiba dei hok ban ïoh ïa ka CoV kiba la ju kamai hangne da ki phew phew snem kim pat ïoh ïa ka CoV. Mynta mano ban bah khlieh ïa kane ka shi bnai ka jingduhnong jong ki. Kato ka 10 hajar kaba ki ong ban ai ïa kiba rung sha thie (Parking Lot) bad mar 2 hajar sa san bnai kynthih ka dei ka hok jong ki, kam dei ka jingai kylluid mynsiem jongno re jongno hynrei ka dei hi da ka skhim kaba wanrah hi da ki nongdie madan,” la ong ka Kong Rngad.
“Ka pop kam dei ka jong ki ba ki khlem ïoh ïa ka CoV. Ngi la kdew shi kdew ïa kane ba ki donhok ban ïoh ïa ka CoV hynrei balei kim ïoh haduh mynta. Lada dei ka jingbakla, dei ban pynbeit. Hynrei ngam tharai ba kan dei kata ruh namarba ym dei tang uwei ne arngut ki kyrteng kiba lait hynrei ki la don 60-70 ngut kiba dei hok ban ïoh kiba haduh mynta kim pat ïoh ïa ka CoV,” ka la ong.
“Ka don ruh ka jingpynthame, haba ki (nongdie madan) leit buddien, ki (Municipal) ong wat ju khuslai kan sa mih (ka kyrteng) ha ka Second List. Ha ka (jingïalang) jong ka PTVC ruh ngi la ïakren ïa kata hynrei ka PTV ruh ki shu khih khohreh ban shong (jingïalang) ba ka don ka jingbishar ha ka Iingbishar. Ka jingïalang ba khatduh eh kaba ki shong (ïa ka jingïalang jong ka PTVC) ka dei ha ka 23 tarik, Jylliew. Hadien kata, ngi la ai ruh ïa ki jingthoh ban pyni ba ki dang bun ki briew ki bym pat ïoh (ïa ka CoV) hynrei ki khlem khot ïa ka PTVC,” ka la bynrap.
Ka la ïathuh ba ka jingïakhih jong ki nongdie madan ka long namarba ki la sngew suhsat.
Shuh shuh ka la ong ba ka PTVC ka la thaw ïa ka Sub-Committee ban jied ïa ki kyrteng jong ki nongdie madan kiba dei hok ban ïoh ïa ka CoV.
“Shi bnai ki briew ki la ïapthngan ka la dei ka kam kaba kyrkieh. Mynta, ynda la shong ïa ka jingïalang jong ka PTVC bad lada ki don shisha ïa ka jingthmu kaba shai ki bat shisha ïa ka aiñ, ngi ruh ngi la long kiba kloi ban shong mynnin ne mynta ban ïa pynbeit. Ngin dang ïai bteng beit ban shong hangne tad haduh ba ka (PTVC) kan da lah ban pynbeit ïa kiei kiei baroh,” la pynpaw ka Kong Rngad.
“Kito kiba dei hok, phim bit shuh ban pynslem bad don kiba shong hangtei (Parking Lot, MUDA) ki bym dei hok ban ïoh bad lada don ki briew kiba pynshlur, lada dei ki briew jong kawei ka seng ne na Municipal ne kino kino ki ïada ïa ki bym dei hok, nga nud ban ong ba ka dei ka jingpyndonkam bakla ïa ka bor bad ka don eiei,” la kynthoh ka Kong Rngad.
“Ngin ym sngapjar namarba ngim kwah ba kane kan long ka ktem ïadie ïa thied laisen, ka ktem ïadie ïa thied jaka,” la maham ka Kong Rngad.
