Shillong, Jylliew 17: U Samla Biswal Paul Makri u dei u riew ïaleh ka KSU uba la pha ïa la ka jingim na ka bynta ka jingshngaiñ ka Jaidbynriew Khasi. U samla Paul u dei na ka shnong Umrit na Western Ri Bhoi bad la kha ïa u ha u snem 1971.
Ha u snem 1987 ka la don ka jingïakhih kaba jur bha ha sor Shillong ban ïa khun pyrshah ïa ka jingthombor ki poiei Nepali kiba la shoh la dat ïa ki samla Khasi, knieh ïa ki jaka puta ki Khasi bad leh be-i-jot ïa ki kynthei Khasi. Ïa ka jingïakhih la pynlong da ka KSU hapoh ka jingïalam u Bah Bull N Lyngdoh. U Paul Makri u dei u volunteer ka KSU bad ha kato ka por u sah wai ha Jaïaw ha ïing jong i Kong (Dr.) Garod.
Ha ka 15 bad 16 tarik u Jylliew ki pulit CRPF ki la synreit kuli pathar ïa ki dkhot ka KSU bad ki paidbah ha kylleng ka sor Shillong ha kaba bun ngut ki la mynsaw jur. Wat hapdeng ka jingpyntieng kohtympan ki bor sorkar da ki suloi, ki dkhot ka KSU bad ki paidbah kim shym la kynran dien bad ïa bteng ïa ka jingïakhun ha ka sngi kaba bud kata ka 17 tarik u Jylliew.
Ka 17 tarik ka dei ka sngi kaba sngewsih ïa ka ïing ka sem u Biswal Paul Makri ha kaba ki pulit CRPF ki la synreit kuli ïa u bad ïa kiwei ki paidbah ha kaba bun ngut ki mynsaw bad ar ngut ki la kyllon ïap hajuh kynthup ïa u Paul.
U Iskai Makri, u paralok ba ïa sah lang bad u Paul Makri u la ïathuh kumne: “Ka don ka jingïakhih kaba shyrkhei bha ha Mawkhar bad Motphran. Nga bad u Paul ngi leit ban ïakhun pyrshah ïa ki Nepali bad ki CRPF ha Motphran. Hadien kane jingïakhun kaba la neh katto katne por, ki pulit CRPF ki la sdang ban wan da ki trok bad load ïa ki rifles ki jong ngi. Nga ong ïa u Paul Makri ïa phet noh namar kine ki CRP kin sa siat, u Paul u pyneh bad u ong pynban ngam salia ban ïap na ka bynta ka ri bad ka Jaidbynriew. Hadien kane nga la ran kham shadien bad u Paul Makri u ïakhun beit shakhmat. Sa kham shiphang nga leit khot biang ïa u Paul hynrei u kyntait war bad ong biang ba ngam salia ban ïap. Nga leit khot biang sa shisien hynrei u Paul u pyneh hi triang bad ong ba um tieng ïa ka jingïap”
U Biswal Paul Makri u la shah synreit kuli pathar ha ki CRPF haduh ba ka khlieh jong u ka la pra phum bad kyllon ïap ha madan thma. Ha ryngkat u Paul, uwei u daju Khasi na Smit u bym don bynta ha ka jingïakhih u la shah bat ha ki CRP ha ïewduh bad u la shah bom shah tied bad shah siat ïap.
Ha kane ka por u samla Paul u dang don ha ka rta kaba dang lung ha kaba u dang 16 snem. U dang don ha ar tylli ki jingpule, kata ka jingpule klas 9 ha Government Boys School bad ka jingpule Karate ha YMCA ha ka White Belt.
Ka jingïap u Paul Makri ka la pynkyndit bynriew ïa ki nongshong shnong ka Western Ri Bhoi kaba la jyllei da ki poiei Nepali. Ki paidbah ki mih shnong ban beh krad lut ïa ki Nepali bad ka Western Ri Bhoi mynta ka la dei ka thaiñ kaba ïa shong ïa sah tang para Khasi. “You can kill me but you cannot kill the movement.”
