Shillong, K’ lyngkot 18: U Symbud Myntri Rangbah ka jylla Bah Prestone Tynsong uba khmih ïa ka tnat District Council Affairs (DCA) u la ong ba u Lat ka Jylla CH Vijayashankar u la long kum u Kñi jong ka jaitbynriew Khasi namarba u la sngewthuh ïa ka rukom bat khyndew, ka riti dustur bad ki aiñ kiba kyrpang.
“Dei halor kane ba u la pynkloi ban ai ki jingmynjur ïa kiba bun ki Aiñ-rew jogn ka KHADC kiba la phah da ka tnat DCA,” ong u Bah Prestone haba kren ha ka Dorbar Iktiar Paidbah ba la pynlong da ka KHADC ha madan Polo.
“Nga kmen ban don ha kane ka sngi, ha ka kam long nongmihkhmat kan dei ka sien kaba nyngkong ban sakhi ïa kum kane ka prokram. Watla u la Lat u dang don tang khyndiat bnai hynrei u la long kum u Kñi jong ka jaitbynriew naba u la pyrshang ban sngewthuh ïa ki riti dustur jong ka jaitbynriew Khasi bad dei halor kane ba u la mynjur ïa kiba bun ki Aiñ-rew jong ka KHADC. Nga ngeit skhem ba ka jingdon une u rangbah kan long ka jingkyrkhu ha kane ka jingïalang,” u la bynrap.
“Nga la ïohi ïa ki jingkylla ha ki lai tylli ki Autonomous District Council (ADC) hadien u snem 2018 bad hapoh kine ki snem ki don bun ki Aiñ-rew kiba la jah noh bad klet wat ïa ki tarik jong kine ki Aiñ-rew hynrei ha ka Sorkar kaba mynta la lah ban ai ki jingmynjur bad hadien u snem 2018 ngi la lah ban ai jingmynjur ïa ki Aiñ-rew hadien ba la pynlong ïa ki jingïasyllok bad ki la don bun ki Aiñ-rew ba la mynjur,” la bynrap u Symbud Myntri Rangbah.
U la ong ruh ba hadien ba la pynmih ïa ka hukum jong ka Iingbishar Meghalaya High Court ha u snem 2014 la pynlong ïa ka Sorkar Jylla ban shna ïa ki aiñ ban ïada ïa ka ri bad ka jaitbynriew, ïa ka District Council bad kumjuh ruh ïa kiwei.
“Nga ïohi ba ka Land Bill ka la pynskhem ïa ka riti dustur bat khyndew da ki Kur, ki Hima, ka Raid ne nongkynti. Ka MMDR Act kam lah ban treikam ha kane ka jylla Meghalaya bad dei ha u snem 2019 ka Supreme Court ka la pynskhem ba ym tang ha sla khyndew hynrei shaduh sha ramew la long trai da ki trai khyndew,” u la ong.
Ha kawei pat ka liang u CEM ka KHADC u Bah Pynïaid Sing Syiem u la ong ba ka jingai ka jingmynjur jong u Lat ïa ka Administration of Elaka Act 2023 ka la long kaba kongsan bha.
“Ngi la don kumba 54 tylli ki Elaka, 5 hajar ki shnong ba kynthup ïa ki seng Kynthei, ki seng samla, ki dorbar shnong bad la don haduh 5 hajar tylli ki kur ha kane ka jylla. Kane kan long ka sngi sah kynmaw ban ithuh lyngba ka aiñ ïa kine ki seng baroh,” ong u CEM.
“Nga ai khublei ïa baroh ki 30 ngut ki MDC ha kane ka samoi treikam ba mynta lyngba ka 6th Scheduled la ai bor ïa ngi ban thaw aiñ. ïa ki aiñ ba ladep ban mynjur la lah ban pynkylla sha ka ktien Khasi. Naduh mynta ka sngi la ithuh ïa baroh ki seng, ki dorbar shnong, ki sengkur, ki Rangbah kur, bad la bthah ïa baroh ba kin pynrung kyrteng ïalade hapoh ka KHADC lyngba u Registrar,” la pyntip u CEM.
Ha kane ka sngi la sam ruh ïa ki syrnot jingithuh sha ki seng bapher bapher kiba la shah khot sngewbha ha kane ka sngi, bad ki jingkren na kiba bun ki rangbah bad kumjuh ruh na ki nongïalam Hima.
