Shillong, Naiwieng 01: Ka Federation of Khasi-Jaintia & Garo People (FKJGP) ka dap da ka jingsngew lynngoh halor ka jingkynthoh jong u Myntri jong ka Sorkar jylla uba peit ia ka tnad PHE ha ki lad pathai khubor haba iadei bad ka jingshim nongmuna ia ka umbam umdih na ki 46 tylli tyllong um na ki kyntoit bapher bapher jong ka nongbah shillong.
“Ka Seng kam sngewpher ia kane ka jingkwah tep eit miaw jong une u Myntri ka tnad PHE namar u hap ban darapjot ia ka jingtreikam thurmur jong ka tnat jong u kaba pynpoi ia ka umbam umdih kiba buh jingma ia u paidbah ha ki 44 tylli ki tyllong um katkum ka kaiphot ba la ioh da ka Seng lyngba ka State Food Testing Laboratory Pasteur Hills, Shillong,” ong u kyrwoh ba la phah da u President ka FKJGP Central Body, Bah Dundee C. Khongsit.
Haba pynshai halor ka jingshim nongmuna dang shen da ka seng ia ka um na ki kyntoit bapher bapher ka Sor Shillong, u Bah Khongsit u la ong, “khyndiat khnang ban iashai, ka Seng ka shim ia kane ka sienjam banyngkong ban phah shim nongmuna na ki Kor um bad top um na kylleng ki kyntoit bapher bapher jong ka nongbah shillong ka long hadien ka jingujor na ki paidbah na ki shnong bapher bapher kaba la poi sha ka seng. Khnang ban pyntikna ia kane ka jingartatien jong ki paidbah ka Seng kaba don ia ka jingkitkhlieh ka la shim ia kane ka bynta ban phah leh tes ia ka um katkum ka jingbtah kyrpang (Standard Operating Procedure) jong ka State Food Testing Laboratory Pasteur Hills, Shillong ym kumba la kynnoh da u Myntri ba imat ka FKJGP ka la leit tong ruma naei naei ne nangno nangno kaba sngewsih imat une u Myntri u khlem pat pule imat ia kato ka kaiphod (report copy) kaba ngi la aiti sha u Myntri Rangbah ka Jylla bad phah kopi ruh sha u Myntri ka PHE bad sha ka Myntri ka Koit ka Khiah jong ka sorkar jylla bad dei na kata ka daw u sa kren klumar. Jin lada u la pule un lap bad un tip shai katno tylli ki tyllong ne ki kor um kiba la phah tes bad katno tylli kiba don jingma bad katno tylli kiba shngain.”
“Sa kawei ruh ngi kwah ba u Myntri jong ka tnad PHE u dei ban long khuid haba iadei bad kane ka bynta namar u ong ba ka um ba la sam da ka tnad PHE ka long kaba biang bad shngain ban dih namar ki ladep tes na Mawphlang Treatment Plant te sngewbha ai ia ki kopi jong ki kaiphod ba la leh ia kita ki tes lyngba ki lad phathai khubor ym ban shu kren tang da ka shyntur, ko myntri kane ka dei ka kam iap kam im jong u paidbah khamtam u duk u suk namar kum ka Seng ngi kwah ban iada ia u paidbah shwa ban ioh ka jingpang kumba ong ha ka ktien nongwei, ‘Prevention is better than cure” na kaba dih ia kum kine ki jait um ba la sam da ka tnad PHE,” la kynthoh ka Seng.
Ka Seng ka kwah ban buh kane ka jingkylli tharai lyngba ka jingpynskhem bad jingpynshai jong u Myntri ba ka um ba la sam da ka tnad PHE ka long kaba la shngain shisha ai ba ka um ba ki Myntri Sorkar ne ki Heh Sorkar kiba shong ha Secreteriat kin dih beit beit ia ka um kaba wan na tyllong ne top um ka PHE, ym donkam shuh ban ia buh kito ki Filter ne Aquaguard namarba bun na ki longiing ki dei ki bym kot bor ne kiba duk kim bym iohlad kumba buh ma ki ha Secreteriat.
“Ka Seng kan ym shong kli kti halor kane ka mat kaba ktah im im peit peit ia ka koit ka khiah jong u paidbah bad kyntu ia ka Sorkar ba kan leh la ki jong ki kamram,” la pynkut u kyrwoh.
