Shillong, Jylliew, 03: Ha ka jingwad bniah, ki Pulit ka jylla ha ka sngi Baar ki la ïoh tam ïa kawei ka wait ba la pyndonkam ban pynïap ïa u Raja Raghuvanshi, ha kaba la lap ïa ka met jong u na kawei ka riat kaba jylliew ha ksaid Weisawdong hadien ba ma u bad ka tnga jong u ki la jah rngai katba ki dang leit ‘honeymoon’ sha Sohra.
“Ngi la ïoh tam ïa kawei ka wait. Ka dei ka wait kaba dang thymmai bad la shu pyndonkam ïa ka tang na ka bynta kane ka kam,” la ong u Superintendent of Police ka East Khasi Hills Bah Vivek Syiem ha ka jingïakren bad ki lad pathai khubor.
Da kaba pynpaw ba ka dei ka ‘case pynïap briew’ kaba pawshai, u la ong, “u briew (Raja) u la shah pynïap, ym don jingkylli eiei shaphang kane bad ngi la register case ruh na ka bynta ka jingpynïap briew bad ka jingpynduh pyndam ïa ki sabut. Ym don jingartatien shuh ba ka dei ka jingpynïap briew. Ngi la lap ïa kaei ka jingthmu ha lyndet jong kane.”
Une u heh Pulit ka East Khasi Hills u la ong ba kane ka case la shim kum ka kam ba hakhmat eh bad ka Special Investigation Team (SIT) ba la khlieh da u SP (City) Bah Herbert Kharkongor ka trei la kamram ban tohkit bniah halor kane ka jingjia.
Ïa u Bah Kharkongor yn sa ïarap lang da ki saw ngut ki Deputy Superintendent of Police (DSP), kata, u DSP (crime), DSP (city), DSP (operations) bad SDPO Sohra nalor ki arngut ki Sub-inspector.
Haba kylli, u Bah Syiem u la ong ba ki Pulit ki dang ap ïa ka kaiphod jong ka Post-mortem examination ban tip shai la u Raja u la ïap shwa ban shah bret ne hadien ba ladep shah bret sha ka riat ba jylliew.
“Ngim lah ban ong la u la shah pynïap ne u la shah bret hynrei haoid shisien ba ngi la ïoh ïa ka kaiphod jong ka Post mortem, hangta ngi lah ban pynthikna ïa ka jingïap, la ka jingmynsaw ka pynlong ïa u ban ïap shwa ban shah bret lane hato u dang im bad shah bret, ngin sa tip na ka Post-mortem,” u la ong.
Shuh shuh u SP u la ong, “ngim lah ban ong hynrei ai ba ki jingshisha kin paw bad haoid la pyndonkam ïa ka tiar ban pynïap briew la ka long da ka jingthmu ban lute, na ka bynta ban pynshitom beiñ lane la ka don kano kano ka jingïashun ne da kano kano ka daw hapdeng u nongshah kynnoh bad ki lanot. Ngi donkam ban wad ïa ki sakhi sabut bad hadien kata ngin sa lah ban ai jingkynthoh hynrei ha kum kane ka por ka dang long kaba kloi eh ban ong eiei.”
Ha kajuh ka por u Bah Syiem u la pyntip ba ïa ka kurim jong uba ïap ka Sonam ym pat lap dien satia hynrei ki kynhun ki dang bteng haduh mynta ban wad ha ka thaiñ Sohra.
“Lashai, ngin sa sdang biang ïa ka jingwad ha ki bynta ba marjan namarba ka riat ka jrong bha. Ngin sa leit wad sha kito ki jaka kaba jngai kumba 1 ne 2 kilomitar na kato ka jaka,” u la ong.
Ki kynhun kiba ïashim bynta ban wad ki long na ka NDRF, SDRF, bad Special Operations Team ki ban hiar mynta sa sha ki lai tylli ki riat ba kham jylliew.
Ki shi kurim na Indore, Madhya Pradesh, kiba la wan poi ha Nongriat ha ka 22 tarik, Jymmang la ïohi khatduh eh ha ka 23 tarik Jymmang hadien ba ki la mih na iingbasa Shipara Homestay ryngkat bad u nongïalam lynti. Ïa ka Scooty jong ki, kham hadien la lap ba la iehnoh ha Sohrarim ha ka 24 tarik Jymmang.
Ki bahaiing hasem jong ki shi kurim ki la dawa ba dei ban aiti ïa ka jingtohkit ha ka CBI.
 | ReplyForwardAdd reaction |
