Shillong, K’lyngkot, 05: Da ka jingthmu ban kyntiew ïa ka kam jngoh kai pyrthei ha rilum Jaiñtia uwei u rangbah u la shna pynwandur ïa ka rel shoingkai kaba nyngkong eh ha ka thaiñ khnang ba ki nongwan jngoh kai kin ïoh lad ban shongkai pynngad. Ïa une u riew shemphang la tip kyrteng kum u Bah Martis Langwar na ka shnong Mukhap ha kaba u la shna pynwandur ïa ka rel kaba long ban shong briew tang kumba lai ngut ha ka jaka jngoh kai pyrthei kaba la tip kum ka Kupli Holiday Retreat kaba don ha ka shnong Ïawthymmei kaba hap hapoh Laskein C&RD Block, West Jaiñtia Hills District.
U Bah Langwar u dei u briew uba khlem leit pule satia ïa ka laiñ Engineer hynrei da ka jingstad jong u hi, u la lah ban pynwandur ïa ka rel da kaba pyndonkam da ki tiar ki tar kiba suk kiba lah ban ïoh hapoh ka jylla.
La jer kyrteng ïa ka rel kum ka Nature Mini Trail Train ïa kaba la pyndonkam tang da ka bor Gravity bad la plie paidbah ïa kane ka rel ha ka 3 tarik Kyllalyngkot 2026.
U nongshna bad ki dkhot jong ka Society ki la kyrpad ïa kiwei pat ban ym pyrthuh bud ïa kane ka jingshna khlem da ïoh bor na u Bah Martis Langwar namarba kan pynkheiñ ïa ka Copy Right Act.
