Shillong, Jymmang, 20: U State Working President jong ka National People’s Party (NPP) u Marcuise N. Marak uba long ruh u Myntri ka Sorkar Jylla ha ka sngi Baar u la ong ba ki la don ki nongïalam jong kiwei ki seng saiñpyrthei kiba phah ïa ki ksiang ban pynpaw ïa ka mon ba ki la kwah ban pynïasoh sha ka NPP.
Ha ka jingïakren bad ki lad pathai khubor u Marcuise u la ong, “haoid, ki la don ki ksiang hynrei ha ka por kaba biang ngin sa pyntip ïa kata ha ka por kaba dei.”
“Kum u working president jong ka NPP uba khmih ïa ka rilum Garo nga ladep pynbna ba ngan sa lum jingïalang ha manla ka district bad ngan sa ïakynduh ruh ïa ki nongïalam jong ki party bapher bapher. La pyntip ïa nga ba bun na ki nongïalam barim kiba la pynïasoh bad kiwei ki seng saiñpyrthei ki la kwah ban pynïasoh bad ka NPP,” u la bynrap.
Kane ka jingïakren jong u ka long hadien ba arngut ki MLA barim ba kynthup ïa u Sengnam M Marak (u MLA barim ka Rongjeng) bad u Francis Pondit R. Sangma (u MLA barim ka Mawshynrut Constituency) ki la pynïasoh bad ka NPP.
U Marcuise u la ong ba u Sengnam u la pynïasoh ryngkat bad 300 ngut ki nongbud.
“U (Sengnam) ong ym pat ju don ha ka histori jong ka jylla Meghalaya, ban ïohi ïa ka jingkiew ka roi ka par ha rilum Garo ïa kaba ka sorkar ba la ïalam da u Conrad Sangma kan theh sha rilum Garo,” la ïathuh u Marak.
“Ka rukom pynïadei bad ki paidbah bad ka rukom pyntuid ïa ki kam pynroi bad ha jingpyndap ïa ki kam kiba thylli ka long da ka lynti kaba khuid bad kaba shai. Kane ka dei ka daw kaba pynlong ïa ki ban pynïasoh sha ka NPP ha rilum Garo,” u la ong shuh shuh.
“Ka jingkiew ha ka roi ka par bad ka jingshna ïa ki shlem pule ha rilum Garo, bad ka sorkar ka hap ban ïakhun ruh ïa ka jingkylla ha ka suiñ bneng. Kine ki dei ki mat kiba ka Sorkar Meghalaya hapoh ka jingïalam jong u Conrad Sangma kum u Myntri Rangbah ka la shimkhia,” la ong shuh shuh u Marcuise.
