Shillong, Nailar 01: Hadien ka jinglah ban ïoh jingjop jong ki 2 tylli ki tamasa ban die ïa ki soh bathiang ha ka ri, kumta ha ka sngi Thohdieng la sdang pat sa ka Meghalaya Pineapple Festival kaba 3 kaba la pynlong ha Dilli Haat, ha kaba la pyninam ïa ki soh bad ïa ki marrep ka jylla Meghalaya bad la ïasoi ruh ïa lai tylli ki soskular ban wanrah ïa ka jingkylla kiba pynpoi ïa ki mar na ki jaka rep sha ki ïew ki hat bapher bapher.
Ha kane ka sngi ïa kane ka tamasa la plie da u Myntri ka Sorkar Pdeng uba khmih ïa ka tnad Agriculture bad Rural Development u Shivraj Singh Chouhan ha ka jingdonlang u Myntri Rangbah ka jylla u Conrad K. Sangma, haba ïaroh ruh ba u sohtrun ka Meghalaya u dei uba shngiam bad uba thiang tam, kaba um pat ju ïoh mad.
Ha ka jingpyrshang ban kyntiew ïa ki nongrep, ka Sorkar Meghalaya ka la ïasoi ruh ïa ka MoU bad ka Reliance Fresh, Amazon Karigar bad ka Blue Tokai Coffee Roasters ki ban thied, ban pynïar ïa ka jingdon une u soh ha ki Nongbah ka ri bad ban pynkhlaiñ ruh ïa ka jingkhaiï ïa ki marrep kiba pynmih na ka jylla.
“Ki jingthung na Meghalaya la jan baroh hi kidei kiba khlem pyndonkam dawai ne organic. Mynta ka sngi, ka lyer ha Delhi ka la dap da ka jingsma iwbih ka Meghalaya. Ngam lah shuh ban sangeh ïa ka jingbam ïa u sohtrun, ki long shisha kiba kyrpang,” ong u Chouhan haba pynthikna ba ka sorkar pdeng kan ïai bteng ban kyrshan ïa ka jylla Meghalaya ha ka rep ka riang.
U Myntri ka sorkar pdeng u la ïaroh ïa ka sorkar Meghalaya bad ai ka jingïaroh ruh ïa ki nongrep bad ïa u Myntri Rangbah halor kane ka kam kaba khlem shongthait.
Ha kane ka Festival la sakhi ruh ïa ka jingpyllait paidbah ïa ka jingseisoh kaba thymmai ka jylla Meghalaya ha ka kam rep, kaba ïaid ryngkat bad ka Vision@2032 ka jylla ban kynjoh sha ka $16 billion ka ïoh ka kot.
Ki sienjam kiba kynthup ïa ka jingpynïar ïa ki karkhana, ban pynkhlaiñ ïa ka rukom kit bad jaka buh ïa ki mar, ban kyntiew ïa ka jingrep ïa bunjait ki jingthung bad ban kyntiew ïa ka ïoh ka kot bad ïa ka kamai kajih jong ki nongrep da kaba pynïaid ïew ïa ki marrep.
U Conrad Sangma ula pynpaw ba ka Meghalaya ka pynmih haduh 1.5 lak metric ton u sohtrun man la ka snem ryngkat bad ka jingkiew ha ka jingkhaiï shabar bad ka jingdawa ha la ka jylla.
“Ha ki snem kiba la dep, ngi lah seng ïa bun tylli ki Fruit Processing Unit ba kynjoh sha ki kyrdan ka pyrthei. Mynta da ka jingïasoi ïa ka MoU, ki nongrep ki jong ngi kin ïoh ïa ka lad kaba donkam kata ban pynpoi ïa ki marrep sha ki ïew ki hat ha kaba kin ïoh ruh ïa ka jingkyrshan ha kaba ïadei bad ka kit ka bah ïa kine ki marrep,” ong u Conrad Sangma.
Ha kine ki 3 snem kiba la dep, ka Meghalaya ka la kiew sha ka jingdon sa 27 tylli ki Cold Storage, 8 tylli ki Processing Hub bad ka jingpynïasoh bad ki trok kiba don ïa ki kor kiba pjah, kaba la pynsuk bad khaïi pateng. Ha u snem 2024, ka jylla ka la khaïi 682 metric ton ïa u sohtrun uba lah dep saiñ sha ka European Union, Gulf bad Southeast Asia, katba 150 MT la die ha ki nongbah jong ki jylla ha India lyngba ka jingïatreilang bad ki paralok.
Ha kane ka Festival kaba 3 sngi, la buh ïa ki dukan jong ki kynhun ki nongrep, ka jingailad ban mad ïa ki soh bad ka jingïalang ban ïakren markhmat. Kan don ruh ka jingpyninam ïa ka kolshor na ki nongrwai bad ki nongtem nongput kiba la ïoh jongkyrshan na ka Chief Minister’s Meghalaya Grassroots Music Project bad kane kan long ha Dilli Haat bad India Gate.
Ïa kane ka tamasa la pynlong da ka Department of Agriculture & Farmers’ Welfare ka Sorkar Meghalaya, ka Pineapple Festival ka la kylla long kum ka prokram ban kyntiew ïa ka rukom rep tynrai bad ban buh ïa ka thaiñ shatei lammihngi ha ka jaka kaba biang ha ka ïoh ka kot jong ka ri ha ka liang ka rep ka riang.
Kane ka Festival ha Dilli Hat ka plie ïa ki paidbah ban leit naduh ka por 11 baje mynstep haduh ka por 8:45 mynmiet bad kan kut ha ka 3 tarik u Nailar.
