Shillong, Risaw 25: Ka Mawkynrew Sohphlang Eco-Cultural Indigenous Society ka la pynlong ïa ka ïew tamasa Sohphlang ïa kaba la pynlong ha 25 tarik u bnai Risaw 2024, ha Lad-Kharang Mawkynrew East Khasi Hills.
ïa ka tamasa la pynlong da ka jingkyrshan ka tnad Basin bad ka Tourism, kum shi bynta ban kyntiew ïa ka kam rep Sohphlang, ka la pynlong da ka tamasa Sohphlang ha madan Phutbol Jongksha.
La ong ba ki nongshong shnong lyngba ki Self Help Group ha kane ka thaiñ ki la wanrah ïa ki tiar ki tar ban die, nalor ki jingbam tynrai ba kynthup ïa u Sohphlang, ki jingbam ba tei met ha kane ka tamasa ha ka sien ba ar halor une u jait jingbam tynrai.
ïa katei ka ïew tamasa Sohphlang la wan plie da ka Myntri ka tnad Kam rep ka Kong Ampareen M. Lyngdoh.
Haba kren ha ka jingïalang, ka kong Ampareen Lyngdoh ka la pynpaw ka jingsngewkmen ba ryngkat kiba ïadonbynta lang baroh ki la lah ban pynlong ïa kane ka tamasa kaba jop bad bynrap ba kane ka tamasa dei ban pynlong noh man u snem.
Ka la ong ba ïa u Sohphlang la shim ba um dei tang u jait jingbam tynrai hynrei u dei uta u jait jingthung ïa uba la pyndonkam ha kaba shna dawai ban ïoh jingkoit nalor ka jingpyndonkam ïa u ha ka niam ka rukom bad ka riti dustur u Khasi.
Ka pynpaw ba ka Mawkynrew ka dei kaba la kyrkhu da ka mei mariang, ka la ong ba ki jaka jngohkai kiba don ha Mawkynrew ki la kylla long ki jaka kiba ki nongwan jngohkai ki wad bha mynta ki por.
Na ka liang kiba pynlong ïa kane ka tamasa ki la ong ba kane ka tamasa ka ai ka lad ïa ki nongshong shnong ban ïalong kawei bad ïasnohktilang ban pynshongkun ïa ka prokram. Kane ka tamasa ka long kum ka rynsan ïa ki khun samla ban pyni ïa ki sap ki phong kiba ki don la ka long ha ka shad, ka rwai, ka put ka tem nalor kiwei.
