Shillong, K’lyngkot, 24: U Chief Executive Member jong ka Khasi Hills Autonomous District Council Bah Pynïaid Sing Syiem ha ka sngi Thohdieng u la hiar jurip ïa katto katne tylli ki surok hadien ka jingud jingnam jong ki paidbah bad ki nongniah Taxi jong ka thain Rynjah kiba ju kamai sha Nongthymmai, Khyndai Lad, Nongrah-Mawlynrei,Demsieniong, Polo bad sha Umpling.
Ha kane ka jingjurip la ïadonlang ruh ki longkmie, ki samla, ki Rangbah Dong jong ka Shnong Rynjah, u Second Incharge jong ka Rynjah Traffic Branch u Bah Lambha Pyrbot.
Ha kaba ïadei bad ki nongniah taksi kamai na Rynjah sha Demseiniong, ki nongkikam jong ka Association kin sa leit ïakynduh ïa u Engineer jong ka Executive Division PWD Roads ban pynïoh lem khyndiat ban shna ïa ka nala bad ban tap slep ïa ka Nala khnang ban ïoh pynieng ïa ki kali kiba kamai ban ïoh thep passenger bad kan ïarap ruh ïa ki passenger kiba ap kali..
Sa kawei pat ka dei ka jaka ieng jong ki kali kiba kamai na Rynjah sha Nongrah ha kaba ka jingdon jong ka Post Office bad ka BSNL ka la pynkhapngiah ïa ki kali ban ap passenger.
Halor kane, u Bah Pynïaid ula ong ba un sa shimkhia ryngkat lang bad u Rangbah Shnong bad Rangbah Dong bad ban ai da ka jingthoh sha ka Post Officer bad ka BSNL khnang ban pynpra noh khyndiat ïa ka kynroh khnang ban kham pynheh ïa ka jaka ieng kali.
Kawei pat ka dei ka jaka ieng jong ki kali kiba kamai na Rynjah sha Umpling ha kaba la rai ban pynkynriah noh shajan ka Dispensary.
U Bah pynïaid ula ong ba un sa shimkhia ïa kane khnang ban pynsuk ïa ka leit ka wan khamtam ïa ki tymmen ki kro bad ki nongkit nongbah bad kan ym don ka jingdheng kali ha ka bynta jong ka them rynjah ha kaba sdang jong ka jingkieng ynda hiar na ka shnong Rynjah.
U la kyrpad ïa u Rangbah Shnong ban ai jaka lem ïa ki nongniah kali bad kumjuh ïa u Second Incharge ka Rynjah Traffic Police ba un peit lem ïa kane ka jaka ïa kaba u Bah Pynïaid un sa leit ban ïapynbeit bad ka tnat PWD (Roads) ban ai jaka khnang ban suk ka leit ka wan bad lait na ka dheng kali.
U Bah pynïaid u la pynpaw ruh ba un nang ïai trei bad don ryngkat bad ki Dorbar shnong lada dei ha kano kano ka liang kaba ki paidbah ki donkam.
