Shillong, Risaw 21: Ka Garoland State Movement Committee (GSMC) ka la ujor da ka ejahara ha ki Pulit ka Babadam Outpost Police Station pyrshah ïa uwei u riewshimet uba la ithuh kyrteng kum u Aminul Islam halor ka jingkynnoh ba u la pynphriang ïa ka khubor lamler bad ki kyntien kiba ktah pyrshah ïa ka kynhun A’chik (Garo) hapoh ka social media.
Ïa kane ka jingujor la phah da u Silbirth Sangma, Assistant Environmental Secretary jong ka GSMC, kaba ong ba u Islam, uba dei u bar jylla, da kaba lamler u la kam ba ka kynhun jaitbynriew Garo (A’chik) ka don ka jingïadei bad ka seng lehnoh kaba la shah kheiñ beaiñ ka Garo National Liberation Army (GNLA). Hynrei na ka liang ka GSMC ka la kyntait war ïa kane ka jingshah kynnoh ba ka don ka jingïadei bad katei ka seng.
Shuh shuh, ha ka FIR la kynnoh ba u Islam u la pyndonkam da ki kyntien kiba ktah bad kiba long ruh da ki ktien sih pyrshah ïa ka jaitbynriew A’chik bad kumjuh ruh ïa ki seng ka imlang sahlang.
Ka GSMC ka la kren da kaba shai ba kine ki kyntien kiba wanrah ka jingisih ka la wanrah ïa ka jingbym shongsuk, ka jingbun ka jingpyrkhat, bad ka bym shongshngaiñ hapdeng ki kynhun kiba don ha kane ka thaiñ. La ong ba na ka liang ka seng ka la phah bad aiti ruh ïa ka video clip kaba don ïa kine ki jingkynthoh sha ki pulit kaba long ruh kum ka sakhi.
Ka committee ka la kyntu ïa u Officer In-Charge ban shim kam noh mardor lyngba ka aiñ pyrshah ïa u Islam ba u la pynsaphriang ïa ki jingkynnoh kiba lamler bad uba la pynlehraiñ bad pynjah burom ïa ka jaitbynriew A’chik baroh kawei.
Kumba long mynta kane ka kam ka dang don hapoh ka jingtohkit jong ki pulit ban lap ïa ki jingshisha baroh.
