Shillong, Rymphang, 12: Ki nongïalam jong ka Meghalaya SSA School Association (MSSASA) ha ka sngi Balang ki la mudui da ejahar pyrshah ïa u Tengsey Sangma ha ki Pulit jong ka Sadar Police Station, Shillong halor ka jingshna be-aiñ ïa kawei ka kynhun ha ka kyrteng jong ka Meghalaya SSA School Association (MSSASA) ha Facebook Page ba la shna da u Keringbarth Marak, da kaba buh ruh ïa ka kyrteng jong u President ka MSSASA u Bah Aristotle C. Rymbai.
Ha ka jingthoh la pyni tyngkreiñ ba u Tengsey Sangma u la thoh ïa ki kyntien ha ka ktien phareng kaba ong, “shano u nongïalam? Balei shu sngap jar ha kaba ïadei bad ka tulop kumno ngin phah ïa ki khun sha skul khlem ka pisa? Khlem ka bam ka dih ka jingim ka long kaba eh ngim dei ki mrad, ha rilum Khasi ka MDC election kan sa long, wat ai vote ïa ka NPP ngi kwah CM da u Khasi ym da u Garo CM namar kum u Garo nga isih ïa u CM Garo u bym larkam eiei u CM ka party NPP kam ju peit ka party NPP ka dei ka party shi ïing shi sem. Paralok Khasi baieid wat ai vote ïa ka party NPP ha ka MDC election.”
Haba kren sha ki lad pathai khubor hadien ba ladep ujor ïa ka ejahar, u Bah Aristotle u la ong ba u la ïoh jingtip halor kane ha ka miet sngi Baar na ki paralok nonghikai ba ka jingthoh ka la saphriang bha ha ka social media.
U la ong ba kane ka jingshna be-aiñ ïa ka Facebook Page ha ka kyrteng ka seng ka la ïalam bakla haduh katta katta ïa ki nonghikai skul SSA bad ïa ki paidbah nongshong shnong ha ka jylla.
Ha ka ejahar, u Bah Aristotle u la ong, u briew uba shna ïa ka fake account ym tangba u pyndonkam ïa ka kyrteng jong nga, hynrei wat ïa ka kyrteng jong ka Association kaba nga long u riew dkhot. La lap ruh ba ïa kane ka account la pynmih ha ka 11 tarik, Rymphang, 2025 da kaba thoh ruh ïa ki kyntien ki bym shongnia, hynrei nga kyntait mardor ïa ki jingthoh bad ka jingpynmih ïa ka jingthoh kaba shu leh khlem ka jingtip jong nga. La leh ïa kane ka kam da ka jingthmu ban pynjah burom, ïa ka Association bad ban pynjah burom ïa nga. Nga pyntip ruh ba ngam shym la aibor ban shna ïa ka facebook account ha ka kyrteng jong nga bad ka Association, lymne ban ai wat ïa ki jingtip shimet jong sha kum kine ki briew.”
“Namarkata, nga kyrpad ïa ka tnat Pulit ban pynlong ïa ka jingtohkit halor kane ka kam bad ban leh da kaba tyngeh ïa u briew uba donkti ban shna ïa ka fake account bad ïa ka kyrteng jong ka Association, namarba kine ki jingleh jong ki ka ktah ïa ka burom jong nga bad ïa ka Association. Nga kloi ruh ban ai shuh shuh ïa ki jingtip lada donkam ynda la pynlong ïa ka jingtohkit,” la bynrap shuh shuh ka ejahar.
Haba pynshai halor ka tulop, u Bah Aristotle u la ong, ‘katkum ka jingïakren bad ki ophisar jong ka tnat Pule Puthi ka Sorkar Jylla ha ka taiew baladep, ki la pyntip ïa ngi, ka Sorkar India ka la phah ïa ka mang pisa jong ka 3rd Installment na ka bynta ka SSA Grant. Mynta ki dang ap ban phah ïa ka pisa sha ka Single Nodal Agency Account, kaba dei ka Account jong ka Sorkar Jylla ha kaba ka pisa jingïarap kaba wan na ka Sorkar Pdeng ka Sorkar Pdeng ka phah ïa ka pisa sha kane ka Account. Tang shu phah ïa ka pisa sha kane ka Account, kin sa phah ïa ka tulop sha ka Account jong ki nonghikai SSA.”
U la ïathuh ruh ba ki ophisar jong ka tnat Pule Puthi ki la pyntip ruh kane ka urlong ha kine ki khyndiat sngi.
