Shillong, Rymphang, 10: U Bah Jopborlang Songthiang na ka shnong Mawblang u la ujor da ka ejahar sha ki Pulit ka Madanriting Police Station halor ka jingshahtuh hynriew tylli ki masi ha ka 8 tarik, Rymphang, 2025.
Ha ka ejahar u Bah Jopborlang u la ïathuh ba baroh hynriew tylli ki masi ki biang lut ha ka por ba u la leit set hapoh sem ha ka por 5:30 baje janmiet. U la pyntip ruh ba ki masi kiba la shah tuh ki long uwei u masi kyrtong rongïong, ar tylli ki masi saw kynthei, kawei ka masi kynthei rong lieh, kawei ka masi kynthei bad uwei u masi khun shynrang rong ïong.
U Bah Jopborlang u la pyntip ruh ha ka ejahar ba u la lap ba ki masi ki la shah tuh na sem ha ka 9 tarik Rymphang, 2025 ha ka por 6 baje eiei mynstep.
Shuh shuh u la pyntip ruh hadien ba u leit wad kylleng ka shnong u la lap ïa kawei ka jaka pynieng kali na ka jingpawdien ki taïar kali bad na ka eit masi bad uwei u tyllai rong saw kaba la pynsuba jur ïa u ba ki masi ki jong u ki la shah rong tuh na ka jingjngai ka sem masi bad ka jaka pynïeng kali ka long kumba shiteng kilomitar eiei.
