Shillong, Jylliew 01: Ka A·chik Holistic Awakening Movement (AHAM) ka la aiti ïa ka jingujor sha u Deputy Commissioner ka South West Garo Hills ha kaba ïadei bad ka rukom jied kaba dangshen ïa ki kam AYUSH Medical Officer and Yoga Instructor.
Baroh ki kyrtong kiba la shah jied kim dei ki trai ri trai muluk bad baroh ki rukom jied ka dei kumba la leh klet ïa la ki jong ki riewlum jong ka Meghalaya, pyntip ka seng AHAM.
Katei ka seng ka la ong ba ïa ka interview na ka bynta kitei ki kam la pynlong ha ka 15 tarik u Jymmang bad ïa ki result la pynbna ha ka 20 tarik u Jymmang.
Ka AHAM ka la ong ba ka jingpynmih ïa ki jingpynbna halor katei ka jingthung kam la kdew ba yn ailad shwa nyngkong ïa ki kyrtong kiba na ka jylla hynrei hadien ba la pynmih ïa ki result ka long kaba sngew lyngngoh ba la kyntait pynban ïa ki 3 ngut ki kyrtong kiba dei ki riewlum.
Na ka liang kane ka kynhun ka la bynrap ruh da kaba ong ba ka la dep ban pan da ka Right to Information (RTI) kaba kyrpad ban pynpaw shuh shuh shaphang kane ka jingshim wai ban pynlong ïa kane ka jingthungkam. Ka AHAM ka kwah ruh ba ïa kane ka jingpynbna ïa ki result dei ban weng shwa bad dei ban sdang pynlong biang da ka interview kaba thymmai.
