Shillong, Nailar 25: Ka Hynñiewtrep National Achik Movement (HANM), Mawlai Circle ha ka lah sngi u blei ka la ujor sha u Officer-in-Charge jong ka Mawlai Police Station halor ki kam runar ruser bad ki kam tuh kam thiem kiba la jyllei shaba palat hapoh ki shnong kiba hap hapoh ka jylli jong ka shnong Mawlai.
Ha ka jingujor ba la soi da u President u Bah Barthol Sohlang bad u General Secretary u Bah Felso Jahrin, ka seng ka la ong, “ngi dap da ka jingsngewkhia halor ki jingjia ba har rukom kiba la jia ha kine ki sngi ba mynta ha ka shnong Mawlai kiba wanrah ïa ki jingsyier mynsiem ïa kiba bun ba lang ha ka por mynsngi bad ha ka por mynmiet ruh kumjuh. Ngi la ïoh ïa ki jingtip lyngba ki dkhot ba ka don ka jingshah ot tala ki dukan ha ka por mynmiet ha ki katto katne tylli ki shnong ha kaba la rong tuh ïa ki mar ki mata.”
“Kumjuh ruh ngi ju ïohi ha ka social media ha Mawlai mynta ki bun rukom ki jingsniew khamtam ïa ki khynnah skul kaba pynshong syier ïa ki kmie ki kpa, ka jingshah tuh bike, tuh scooter, kumta ter ter,’ la ong ka seng.
Ka seng ka la kyrpad ïa u Officer-in-Charge ka Mawlai PS ban peitngor ïa kine ki jingjia bad ong ruh ba ka seng ka long kaba kloi ban ai ka jingïatreilang na ka bynta ka bha ka miat ka imlang ka sahlang ha ka shnong Mawlai baroh kawei.
