Shillong, Naiwieng 24: Ka Seng HYC ka la phah da ka jingthoh sha u Bah Lahkmen Rymbui, Chairman jong ka Committee on the Welfare of Scheduled Tribe etc, halor ka jingpynkheiñ ki tnad treikam jong ka sorkar pdeng kiba don ha Meghalaya ha kaba ïadei bad ka jingthungkam ia ki trai jylla.
Ha u kyrwoh ba la phah sha ki lad pathai khubor u President jong ka HYC u Bah Roy Kupar Synrem, u la ïathuh bad katkum ka Office Memorandum (OM) ba la pynmih da ka Ministry of Personel, Public Grievances and Pension ha u snem 2005 bad ha u snem 2022, la bthah ba baroh ki ophis sorkar pdeng kidei ban thungkam ym palat ïa ka 50 percent ïa ki trai jylla ha ki tnad treikam jong ka sorkar pdeng kiba don ha ki jylla ba ki ophis ki don na ka bynta ki post Group C bad Group D. “Kane kadei ka OM kaba la pynmih da katei ka tnad treikam jong ka sorkar pdeng kaba la kdew shai ha kaba ïadei bad ka jingthungkam ha ki Group C bad D”, la ong u Nongïalam ka HYC.
Kane ka jingthungkam kan long katkum ka jingbun briew ha kine ki jylla. Na ka bynta ka jylla Meghalaya, na kane ka 50 percent ba la mang, la bhah ruh 44% na ka bynta ki trai ri trai muluk, nangta 5% na ka bynta ki OBC bad 1% na ka bynta ki SC.
Hynrei la ju lap ba ki tnad treikam jong ka sorkar pdeng, kum ka NEHU, ka NEIGRIHMS, ki Post Office bad kiwei kiwei imat kim bud ïa kane ka jingbthah na ka sorkar pdeng.
Kumta na la liang ka Seng ka ai da ka jingthoh sha u Chairman kane ka Committee jong ka Assembly, namar ba kane ka Committee ka don la ka jong ka bor ban tuklar halor kane, ha kaba ka lah ban khot ne pan jingkheiñ ïa ka jingdon ki nong Meghalaya kiba trei ha kine ki ophis sorkar pdeng ha Meghalaya. Nangta ka lah ban bthah ïa ka sorkar jylla ban tuklar ïa kane ka kam. U Bah Roy, u la ong ba lada kine ki ophis kim sngap lane ka sorkar jylla ne kane ka Committee kam sngap, ka Seng ka lah ban ïaid ruh sha ka sorkar jylla bad sha ka sorkar pdeng ruh.
