Shillong, Jymmang, 08: Ka Khasi Students Union (KSU) South Khasi Hills District Unit, Sohra ha ka sngi Palei ka la ujor sha u Sub Divisional Officer (SDO) ka Sohra Civil Sub-division Bah M. Challam halor ka jingïoh pdiang ïa ki jingujor na ki paidbah nongshong shnong jong ka shnong Shella, Ichamati bad Majai ba ki don ki briew kiba ju khaii tuh ïa ki jait mar bapher bapher ha khappud Indo-Bangladesh.
Ha ka dorkhas ba la soi da u President u samla Ribokstar Diengdoh bad u General Secretary samla Mesadapbor Skhembill, ka KSU ka la ong, “hadien ba ngi la ïoh ïa ka jingujor na ki paidbah kiba shong basah sha ki thaiñ khappud kum ka shnong Majai, Ichamati bad Shella ha kaba ïadei bad ka jingsynjor jong ka thaiñ khappud ha kaba ki nongshong shnong ki la lap bad sakhi da la ki jong ki khmat ïa ki kam khaii tuh ïa ki jait mar bapher bapher da ki briew kiba ym tip satia ki dei kiei kum ka seng ngim lah ban shu shong kli kti.”
“Kum ban shu bynrap, halor kine ki jingujor ba ngi la ïoh pdiang, kum ka seng, ngi sheptieng ruh ba ïoh ka don ka jingpynrung be-aiñ ïa ki nongshong shnong na ka ri Bangladesh shapoh u pud u sam jong ka ri jong ngi lyngba ka kam khaii tuh ha ki thaiñ khappud,” la ong ka seng.
Ka seng ka la kyntu ïa u SDO ba un shimkhia ïa kane ka jingujor da kaba pynkhlaiñ ïa ki bor pahara ha ka thaiñ khappud khnang ban khanglad shisyndon ïa ka jingkhaii tuh ha khappud.
