Shillong, Risaw, 25: Ka Meghalaya Sarva Shiksha Abhiyan Schools Association (MSSASA) ka la phah da ka review petition sha ka iingbishar Supreme Court of India, da ka jingkyrpad ïa ka Iingbishar ba kan khmih bniah biang ïa ka hukum ba la pynmih ha ka 1tarik, Nailur, 2025, kaba la bthah ïa baroh ki nonghikai kiba la don lypa ha ka kam ki dei ban pyndep ïa ka Teacher Eligibility Test (TET), khlem da kheiñ ïa ka jingjrong ka snem shakri jong ki.
U President ka MSSASA Bah Aristotle C Rymbai u la pyntip ba ïa ka review petition la phah ha ka sngi Thohdieng bad pynpaw ruh ka jingsngewnguh ïa ki nonghikai skul SSA kiba la ai jingkyrshan halor kane ka jingthmu.
“Ngi pyntip hangne ba baroh ki nonghikai skul SSA bad kiwei kiwei ki kyrdan nonghikai ha ka jylla Meghalaya ba ka MSSASA hynnin ka sngi ka la ujor ïa ka review petition ha Supreme Court of India,” la ong u Bah Rymbai ha u kyrwoh ba la phah ha ka sngi Saitjaiñ.
Ka rai jong ka iingbishar Supreme Court ka long katkum ka jingpynbna da ka National Council for Teacher Education (NCTE) ba la pynmih ha u snem 2010 bad ba la pynbeit thymmai ïa ka Right to Education (RTE) Act ha u snem 2017.
U la pynkynmaw ba ka tnat Pule Puthi dang shen ka la pyllait noh ïa ki nonghikai skul ba la thungkam shwa jong ka 23 tarik, Nailar, 2010 ban thoh ïa ka eksamin Meghalaya Teachers Eligibility Test (MTET).
Hynrei ka rai kaba dang shen ba la pynmih da ka Iingbishar kam shym la ailad na ka jingshah pyllait hynrei la bthah ïa baroh ki nonghikai kiba dang trei ba ki dei ban pyndep ïa ka TET.
Ka MSSASA ka kynthoh ba ka jingpyntreikam shakhmat ïa ka hukum kan ktah wat ïa ki nonghikai kiba la jan shongthait na ka kam hikai skul.
U Rymbai u la pynpaw ba ka seng kan sa pyntip sha ki nonghikai ïa kino kino ki jingpynbna ha kaba ïadei bad kane ka jingujor ïa ka review petition ha ki sngi ban wan.
Katkum ka jingpyntip jong ka tnat Pule Puthi ka Sorkar Jylla, ki don kumba 43,102 hajar ngut ki nonghikai skul ha ka jylla baroh kawei.
Katba ki nonghikai ki bym pat pyndep ïa ka TET ym la ïoh ïa ka jingkhein kaba bniah.
U Myntri ka tnad Pule Puthi u Bah Lahkmen Rymbui dang shen u la pyni ba ka rai jong ka Supreme Court ka lah ban ktah hapdeng 10,000 – 15,000 ngut ki nonghikai ha Meghalaya.
