Shillong, Naiwieng, 24: Ka District Council Affairs (DCA) jong ka Sorkar Jylla ka ladep thaw ïa ka Komiti ba la kynthup lang ïa ka tnat PWD bad ki lai tylli ki Autonomous District Council jong ka Khasi, Jaiñtia bad Garo ban pynbeit ryntih ïa ka jingdon jong ki khyrdop khrong khajna hapoh ki jylli treikam jong ki District Council ka jylla Meghalaya.
Ha kaba ïadei bad kane, ka Meghalaya Truck Owner Association (MTOA) ha ka sngi Thohdieng ka la ïakynduh ïa u Chief Executive Member (CEM) jong ka Khasi Hills Autonomous District Council (KHADC) u Bah Pynïaid Sing Syiem ban pynsngew halor ka jingbun shaba palat jong ki khyrdop khrong khajna.
“Kum ka seng ngi la ïaid naduh u snem 2019 ban pynsngew ïa ki CEM barim jong ka Council ban siew khajna na ki trok sha ki khyrdop khrong khajna jong ka Council. Ki don katto katne ki jingpynibor jong ki nonglum khajna ïa ki nongñiah trok bad u CEM ka KHADC hadien ba u la ïohi ïa kine ki jingjia ha ki lad pathai khubor u la khot ïakren ïa ngi. Ngi la pynsngew ha u CEM ba ngim lah shuh ban dang siew khajna ïa ki khyrdop ba ki la bun shaba palat,” la ong u President ka MTOA u Bah Moslander Marngar ha ka jingïakren bad ki lad pathai khubor.
U la pyntip ruh ba u CEM ka KHADC u la ïathuh ba ym pat lah ong katno tylli ki khyrdop khrong khajna kiba be-ain bad kiba la ïoh jingbit. “U CEM u la ïathuh ba u la phah ïa ka Working Plan sha ka Sorkar bad haduh mynta kim pat ïoh ïa ka jingmynjur na ka Sorkar,” la ong u Bah Marngar.
U la ïathuh ba ki khyrdop lum khajna ka KHADC kim map wat ïa ki kali kiba kit ïa ki dieng thang ban shet ja sngi ha ki skul.
“Dang mynshisngi, ngi hap ban tuklar da ma ngi ki nongïalam, wat ïa ka trok kit khaw kaba wan na Assam kaba wan lyngba ka surok Rani ruh kim (nongkhrong khajna) map. Ki pynieng bad ngi ki nongïalam ngi hap ban pynsngew bad ban ïakren. U CEM hi u la pynshai ba ka Ophis kam shym la bthah eiei ruh em ban leh kumta hynrei ki la shu ïa leh katba mon da ki nongwai khyrdop,” u la ong shuh shuh.
“Ka jingwan shibun ki khyrdop khrong khajna, kiba shu khrong naphang na ngi ki trai jylla, ka wanrah jingeh ïa ka kamai jong ngi bad ka wanrah jingeh ïa ki paidbah. Lada don ki khyrdop khrong khajna tang 10 tylli, ngi hap ot na ka bai kali, na ki mahajon bad mano ba jynjar, un jynjar hi u paidbah,” u la bynrap.
