Shillong, Naiwieng, 06: Ka North Eastern Hill University Students Union (NEHUSU) ha ka sngi Balang ka la pynher da ka jingthoh sha ka President ka ri India ka Droupadi Murmu kaba dei ruh ka Visitor jong ka skulbah NEHU ban dawa weng kam noh mardor ia u Vice Chancellor, u Registrar bad ia ki Deputy Registrar kynthup ruh ia ki nonghikai bad ia ki nongtrei hapoh kane ka skulbah ki bym larkam.
Ha kane ka shithi jingujor ba la soi da ki nongialam ka NEHUSU bad ka KSU NEHU Unit ki la pynpaw ba ka jinglong jingman jong ka skulbah NEHU hapoh ka jingialam jong u Vice Chancellor u Prof. Prabhakar Shankar Shukla bad u Registrar u Col (Retd) Omkar Singh ka la poi haduh pud bym lah shuh ban iada, bad ki jingma kiba ap ia ka pule pule, ki jingtei bad ka nam jong ka shlem pule.
“Ka jinghiar kyrdan jong ka skulbah ka pynpaw shai ia ka jingbym lah jong ki bor dei khmih (Administration) ban pyndep ia ki kamram ba kongsan jong ka. Shuwa ban thung ia u Prof. P. S Shukla kum u Vice-Chancellor, ka NEHU ka la don ha ka kyrdan ba hakhmat eh jong ki 60 tylli ki skulbah ha ka ri. Hynrei hapoh ka jingialam jong u, ka kyrdan jong ka skulbah ka la hiar arsut sha ka kyrdan kaba hapdeng 100-150, tang hapoh lai snem. Kane ka jinghiar ha ka jingtreikam ka long ka daw kaba kyrkieh ba dei ban pynbeit noh mardor,” la ong ka NEHUSU bad ka KSU NEHU Unit.
Kine ki ar tylli ki kynhun ki la kren diaw ruh ia ki jingbym sngap jong u Vice Chancellor ban pynurlong ia ki jingdawa.
Haba kdew ia ki jingbym lah ban pynurlong ia ki jingdawa, kine ki ar kynhun ki la kdew ia ka jingduna ki Hostel, ka jingbym biang ki Laboratory, ka jingduna nongtrei ban pyntyllun ia ka pule ka puthi bad ia ki kam shakri ha ki ophis. “Wat haba ki post baladep mang ki sah thylli, hynrei u Vice Chancellor um shym la pyndap satia ha ka por kaba biang,” ong ka shithi ujor.
“U Vice chancellor u la pynbna ar sien kynthih ia ka jingthungkam naduh ba u la shimti kam hapoh ka skulbah ban pyndap ia ki post kiba thylli, da kaba pyndam pat khlem kano kano ka jingpynshai kaba dei, kane ka la wanrah ia ka jingduh jingkyrmen bad ka jingbitar ia kiba nongthep kam. Kane ka rukom leh ka la ktah ia ka rukom thungkam bad pynsniewdur ia ka jingpawnam ka skulbah,” la ong kine ki ar kynhun.
“U Vice Chancellor um shym la lah ban pyntyllun ia ka jingiaid beit iaid ryntih ka pule ka puthi jong ka skulbah bad ia ki kam ba iadei bad ka ophis, naduh ka jingpynlong ia ki jingialang Academic Council, kiba la shah pynthud bad pynsangeh noh hapoh ka jingialam jong u. Kane ka la pynpaw ia ka jingbym lah jong u ban ialam ia ka skulbah ha ka rukom kaba dei,” la kynnoh kine ki ar kynhun.
Ka NEHUSU bad ka KSU NEHU Unit ki la iai ban ruh ba ka jingthungkam ia u Col (Retd) Omkar Singh kum u Registrar ka long kaba buh ia dak jingkylli uba heh.
“Ka jingthungkam ia u Amit Gupta kum u Deputy Registrar (Academics) ka la wanrah ia ka jingbym khuid ka thungkam thungjam hapoh ka skulbah. U Gupta um shym la long uba bit ha ka por ba la jied ia ki nongaplai kam ha u snem 2022 namar ka jingbym pat don jingtip eiei ia ki kam pyniaid ophis hynrei hadien la thungkam pynban kum u Deputy Registrar ha u snenm 2024.
Kine ki ar kynhun ki la kdew ruh ia ka rai jong u Vice Chancellor ban thungkam ia ki riewshimet kiba la dei ka rta shongthait bad ka jingthungkam ia u Officer on Special Duty na ka bynta u Director of College Development Council (CDC) bad ia u Guest House Incharge bad kynthup ruh ka jingpep trei khah khah jong u Vice Chancellor kaba ktah ia ka jingtreikam jong ka skulbah ha kiba bun ki khep.
“Wat hapdeng ki jingkyrpad, u VC um shym la thung ia ki Pro Vice Chancellor ha Shillong bad ha Tura Campus kaba la pyndkoh ia ka jingtreikam,” ki la bynrap.
