Shilong, Naiwieng 25: Ka Meghalaya Human Rights Commission (MHRC) ka la ujor suo motu case pyrshah ïa ka Shillong Civil Hospital halor ka jingjia shah tynrah kali ki arngut ki samla pule ha skulbah NEHU dang shen.
Ïa kane ka jingujor la shim halor ka khubor ba la kynnoh da ki bahaïing hasem bad ki samla pule ba ki nongtrei ka Civil Hospital, ki la kheiñ sting ban ai jingsumar ïa ki samla pule ba mynsaw haduh ba iwei ila phlei snam haduh jan dap kynta.
Namar kane, ïa kine ki samla pule la pynkynriah noh sha Nazareth Hospital.
Ka Commission ka la phah notis sha ka Director of Health Services (MI) ka Sorkar Jylla ban pynlong mardor ïa ka jingtohkit bad ban aiti ïa ka kaiphod tohkit sha ka Commission ha lane shuwa ka 7 tarik Kyllalyngkot, 2026.
Ka la jia ha ka 17 tarik Naiwieng, ha kaba arngut ki samla pule ka Department of Chemistry ka skulbah NEHU ka samla Daritngen Pohdukhei bad ka samla Stephanie Shadap ki la shah rat ha ka kali katba ki dang ïaid lynti ha phyllaw jong ka NEHU ban mih sha Gate No-2.
Kane ka kali kaba dei ka Maruti Car ba la niah da u Security Guard uba trei ha NEIGRIHMS hynrei uba sah ha ktem sah ki nongpahara kaba don ha NEHU.
Ki Pulit ki la kem ïa u nongñiah kali u Parman M. Sangma bad la pynngat hapoh ki kyndon ba thmu ban shim ïa ka jingim briew.
Ha ka jingtohkit, ki Pulit ki la shem ba une u nongñiah ka kali u la don hapdeng ka jingbuaid kyiad.
