Shillong, ïaïong, 14: Ka Ri Bhoi Youth Welfare Organization (RBYWO) ha ka Lah Sngi u Blei ka la ieng pyrshah ïa ka jingwad jaka jong ka Sorkar Jylla ban shna iing ïa ki Pulit Central Industrial Security Force (CISF) ha ka thaiñ Umroi.
Ha ka jingïakren bad ki lad pathai khubor u Working President jong ka seng u Bah Apbor Nongrum u la ong ba ka jingpyrshah ïa ka jingthmu ban thied jaka ka long hadien ba ka ophis jong u Deputy Commissioner Ri Bhoi District ka la pynmih ïa ka jingpynbna ha ka 8 tarik mynta u bnai ha ki lad pathai khubor ban khot ïa ka ‘Expression of Interest” na ka bynta ka jingdie ïa ka jaka ban shna ïa ka jaka sah jong ka ing ka sem ki Pulit CISF.
Ka ophis u Assistant Commandant/CASO, CISF, Shillong Airport ryngkat ka jingïatreilang bad ka Sorkar Jylla ki la thmu ban shim jaka na ka bynta ban shna ka jaka sah jong ki Pulit CISF.
U Bah Nongrum u la ïathuh baroh shikatta ki Pulit CISF ki sah hapoh ka Umroi Airport hynrei mynta la wad la kajong ka jaka kaba jngai la kumno kumno 5 haduh 10 kilomitar na Shillong Airport ban pynsah ïa ki.
“Ngi sngew dei ban pyrshah jur ïa kane ka jigthmu thied jaka ïa ki Pulit CISF ka long ba bunsien ki paidbah ki ju mad ïa ki jingeh hadien habud kumba la jia ha Nongsder namar tang ban ïoh ïa ka jaka kin kular ïa ka bneng ka khyndew hynrei dei pat ban kynmaw ïa ki por ba la leit noh ba ki paidbah ki kynduh jingeh na ka jingdon jong ki shipai bad ki Pulit ka Sorkar Pdeng,” u la ong.
“Ngi kyntu ïa ki nongshong shnong kiba don jaka ha kine ki thaiñ ba kin ym buh ïa ka pisa hakhmat namarba ki jingeh ki la ap lypa. Ngi kyntu ruh ïa ki Dorbar Shnong kiba don ha ka thaiñ Umroi, ki Syiem Raid ba kim dei ban ai NoC sha ki briew ba tyrwa ïa ki jaka sha ka tnat Pulit CISF lyngba ka ophis u Deputy Commissioner,” la ong shuh shuh u Bah Nongrum.
“Ngi kyntu ïa ka Sorkar Jylla ban thawlad kumno ban aikam aijam ïa ki samla kiba la pyndep ïa ki jingshah hikai pyntbit kum ki Security na ki Registered Training Institute ban ïohkam hapoh ka kad liengsuiñ ym ban ai jaka sha ka tnat Pulit CISF,” bynrap u Bah Nongrum.
