Shillong, K’lyngkot, 23: Ka Federation of Khasi Jaiñtia and Garo Peoples (FKJGP0 East Jaiñtia Unit ha ka sngi Palei ka la ïakynduh ïa u Medical Superintendent jong ka Khliehriat Civil Hospital u Dr. Alwin Lakiang ban sngewthuh ïa ki jingeh kiba kane ka jaka ai jingsumar kaba don ha East Jaiñtia Hills District ka dang don ki jingeh bad ki jingduna ha kaba shakri ïa ki paidbah.
Ki nongïalam ka seng hapoh ka jingïalam jong u President u Bah Deihok Sumer ki la ïohlad ban ïakren ïa u Medical Superintendent, u Dr. Sures Bareh, u Dr. Pakem bad kiwei kiwei ki doktor.
Ha kane ka jingïakynduh, ki arliang mamnla ki la ïohlad ban ïaphylliew jingmut shibun ki mat ha kaba ki doktor ki la pynpaw ba ki dang don shibun ki jingduna bad ki jingdonkam. Hynrei kaba kham phylla ka long ba kane ka hospital kaba 100 jingthiah ka la treikam tang 65 jingthiah bad kiba kham duna bha ha kane ka Civil Hospital ki long ka jingduna ki kamra, ka jingduna ki nongtrei, ka jingbym biang ka jaka pynieng kali, ka jingbym don ïa ka Machine Ultra Sound, ECG, MRI, CT Scan, ki Doktor Specilist bad ki Quater jong ki nongtrei.
U Dr. Alwin Lakiang u la pynpaw ruh ba lada ki nongtrei ki don ruh ka jingeh ka long namarba kim don ka jaka sah bad wat ka ophis u DM&HO ruh la pyntreikam hapoh ka jaka jong ka Civil Hospital ïa kaba la dei ban pynkynriah noh shawei khnang ban pynkylluid bad ban pynïoh pyndonkam ïa ka Civil Hospital ha ka rukom kaba dei, la pyntip ka seng lyngba u Information Secretary u Bah Michal Chyrmang.
“U Dr. Lakiang u la pynsngew shuhshuh hakhmat ka seng ba ka la don ka jingïakren ba ynda ladep pynkynriah ïa ka ophis jong u BDO Wapung C&RD Block kaba dang treikam ha Khliehriat mynta yn aiti noh sha ka Civil Hospital khnang ban ïoh pyndonkam namarba ka don marjan bad ka Civil Hospital hynrei kane ka shu sah sa tang ha ki jingkular khlem pat urlong haduh mynta,” la bynrap u kyrwoh.
Ka seng ka la pyntip ruh ba ki bor ba dei peit jong ka Hospital ki ladep phah da ka jingthoh sha u Deputy Commissioner jong ka East Jaiñtia Hills bad sha u MLA ka Khliehriat u Bah Kyrmen Shylla uba dei ruh u Myntri ka Sorkar Jylla hynrei haduh mynta ki jingdawa kim pat urlong satia.
Ka seng ryngkat ka jingïatreilang bad ki bor ba dei peit ïa ka Hospital kin sa buddien ïa ki jingduna jong ka Hospital khnang ba kan long ka jingkyrkhu ïa ki nongshong shnong ka thaiñ.
