Shillong, Naiwieng, 24: Ka kynhun Grant Centre for Bhutan bad ka GNH Study ha ka sngi Thohdieng ki la wan ïuhkjat ha ophis treikam jong ka Khasi Hills Autonomous District Council (KHADC) ban ïakynduh ïa u Chief Executive Member (CEM) u Bah Pynïaid Sing Syiem khnang ban tih bniah halor ka jingtreikam jong ki Autonomous District Council katkum ba la pynkup bor da ka Khyrnit Bahynriew jong ka Riti Synshar ka Ri India.
Kine ki nongwad bniah na ka ri Bhutan ki la ïa kynduh ruh ïa u Symbud Lamphang jong ka KHADC u Bah Charles Marngar, ïa ki Executive Member ba kynthup ïa u Fantin J. Lakadong bad ïa u Bah Carness Sohshang.
Ha ka jingïakren bad ki lad pathai khubor, u Bah Pynïaid u la ong ba ha kane ka jingïakynduh kine nongwad bniah na ri Bhutan ki la ïoh jingtip halor ka jingtrei kam jong ka District Council, halor ka Khyrnit Bahynriew bad halor ka synshar ka khadar bad ka rukom bat khyndew bat shyiap.
