Shillong, ïaïong, 05: Ka St Margaret’s Higher Secondary School, Shillong bad ka North Liberty Higher Secondary School, Jowai ki la long ki skul kiba wan ha ka kyrdan kaba nyngkong eh ha ka jingpynbna ïa ka result jong ka eksamin Secondary School Leaving Certificate (SSLC) kaba la pynbna da ka Meghalaya Board of School Education (MBoSE) ha ka sngi Saitjaiñ.
Ka Leisha Agarwal na ka St Margaret’s Higher Secondary School, Shillong bad ka Avila Kathrene P. Lyngdoh na ka North Liberty Higher Secondary School ki la ïoh ïa kajuh ka kyrdan banyngkong da kaba ïoh mar 582 marks.
Katba u Evanshan Nongrum uba pule ha Sacred Heart Boy’s Higher Secondary School, Shillong bad Pori Panday jong ka Jawaharlal Nehru Higher Secondary School, Phulbari ki la ïoh ïa ka kyrdan kaba ar.
U Executive Chairman jong ka Meghalaya Board of School Education u C.P Marak, IFS (Retd) ha u kyrwoh u la pyntip ba ki don 63,682 hajar ngut ki khynnah skul kiba ïakhun ïa ka SSLC Examination ha une u snem bad 55,473 hajar ngut kiba la pas.
Napdeng kiba pas, 22,726 hajar ngut ki dei ki shynrang bad 32,747 hajar ngut ki dei ki kynthei. Lah ruh ba kdew ba 18,903 hajar ngut ki khynnah ki la pas thik tang san tylli ki sobjek katba 36,570 hajar ngut ki khynnah ki la pas baroh hynriew tylli ki sobjek. Ka jingpas jong ki khynnah ha une u snem ka kiew haduh 87.10%, kaba long ruh ka rekod ba thymmai kaba tam ïa u snem 2024 kaba long tang 55.80%.
Ka jingdon jong ki khynnah kiba ïakhun ïa ka eksamin ha une u snem ka la kiew na kaba don ha u snem baladep kaba long 54,134 hajar hadien ba ym shym la pynlong shuh ïa ka Selection Test. Kane ka la long ruh kumjuh ha u snem 2021, hadien ba la pyndam noh ïa ka jingpynlong ïa ka Selection Test na ka daw ka jingwan lynshop ka jingpang khlam COVID-19. Ka jingdon jong ki khynnah kiba ïoh rung ha ka Top 20 ka la kiew na ka 85 ngut ha une u snem 2025 na ka 37 ngut ha u snem 2024.
Ki khynnah kiba la ïoh rung ha ka Top 20 ki long na ki skul kiba don ha sor bad ha ki nongkyndong, ha kaba ki ïasam mar katjuh ki kyrdan. Nalor kata, 341 tylli ki skul kiba pas 100% ha une u snem, kaba pyni ïa ka jingkiew na u snem baladep kaba long tang 180 tylli ki skul kiba pas shi spah na ka shi spah.
Ka result kaba mynta u snem ka long namar ka jingpynleit jingmut bad ka jingminot jong ki khynnah, ka jingpynkylla ïa ka rukom set jingkylli, bad ka jingpynmih ïa ka CM IMPACT Guidebook. Kane ka kot ïarap ka la pynsuk bha shikatdei eh khamtam ïa ki khynnah ki bym ïoh ïa ki jingthoh kiba biang ban pynkhreh ïa ka eksamin.
Ka jingpynlong ïa ka eksamin SSLC ka la long kaba jop da ka jingtrei shitom jong ka tnat Pule Puthi, ki bor synshar distrik, ka tnat Pulit, ki khlieh jong ki shlem pule bad ki nonghikai kiba trei khlem shongthait.
Ka jinglah ban pynbna kham kloi ïa ka result na kaba ju long ha ki snem baladep, ka jingsngewnguh ka long ïa ka jingpyndonkam da ki bor digital da ka Board bad na ki rukom set thymmai ïa ki jingkylli. Haba ïanujor, ïa ka eksamin 2024 la pynlong naduh 4 tarik– 15 tarik Lber bad ïa ka result la pynbna haduh ka 24 tarik Jymmang, kaba slem palat shi bnai.
Naduh une u snem, ka Board ka la pynsdang ïa ka Supplementary Examination, ban pynlong hapoh kajuh ka Academic Year ka ban long la kumno kumno ha ka taiew bakhatduh jong u bnai Ïaiong, 2025. Ki khynnah kiba phiel ha kino kino ki sobjek ki lah ban ïakhun ïa ka eksamin bad ïa ki jingtip kiba bniah yn sa pynbha ha ka taiew ban sa wan.
“Ngi pynaw ka jingsngewnguh shikatdei ei ïa ki skul na ka bynta ka jingai jinghikai ïa ki khynnah ha ki liang bapher bapher. Ka jingaiti lut jong ki nonghikai kiba long ki nongtei ïa ka lawei jong ka ri, ki long ki atiar ban pyntynshaiñ ïa ka jingim jong ki khynnah,” ong u Executive Chairman ka MBoSE.
“Katba ngi dang leh kmen ïa kane ka jingjop kaba pynsah jingmynsaw, to ngin ïatreilang ryngkat ha ki snem ki ban dang wan ban ai ka pule ka puthi kaba bha bad ban pynneh ruh ïa ka jingpas bha khnang ban pyntynshaiñ ïa ka lawei jong ki khynnah skul jong ngi,” la bynrap u kyrwoh.
Ïa ka result kaba bniah phi lah ban peit na ka website jong ka MBoSE www.mbose.in
